Unfa u sa du di diniwooko fuu möön bunu—Lei taa i ta booko i hedi ku wotowan

Faandi mbei a dë fanöudu: Jesosi bi ta buta pakisei a hiniwan sëmbë apaiti, nöö a wan lobihati fasi a bi ta lei taa a ta booko hën hedi ku hiniwan u de. Wan daka di Jesosi bi o kula wan bookojesima, hën a bi si taa di womi ta sen u di gaan hia sëmbë bi sai dë. Hën a tjëën go kula a wan kamian ka hën ku ën wanwan bi dë (Maik. 7:31-35). A bi ta hoi dee bakama fëën a pakisei u di a bi sabi taa na hii soni de bi sa du. Fëën mbei an bi ta lei de hia soni tumisi (Joh. 16:12). Di Jesosi bi dë a Gado a liba ala, a bi ta booko hën hedi ku wotowan tu (2 Tim. 4:17). Kuma bakama u Jesosi u kë djeesi ën tu (1 Pet. 2:21; 1 Joh. 3:16, 18). Woo sa du di peleikiwooko fuu möön bunu, ee u ta hoi di sëmbë di u ta peleiki da a pakisei, ee u ta luku fa libi fëën dë, ee u ta luku andi a lobi, söseei ee u ta buta pakisei a dee booko hedi fëën. A o kë haika u, te a si taa na peleiki nöö u ko u peleiki dëën nasö u ko u paati buku dëën, ma taa u ta booko u hedi ku ën tuutuu.

Fa u musu du ën:

I musu seeka bunu. Na senuwe poi, lafu, nöö abi sutifasi tu.
Buta pakisei a soni di i ta si. I ta si soni di ta lei taa a a’ mii ö? Nasö taa a lo’ paandi soni nasö ta kiija dagu, fou nasö woto mbeti ö? I ta si soni di ta lei andi a ta biibi ö? Kandë i sa tooka di soni di i bi o taki, u taki u dee soni dee i ta si.
Hakisi di sëmbë unfa a ta pakisei u wan soni, haika bunu, nöö na koti ën buka te a ta fan. Ta luku di sëmbë be a si taa i ta haikëën. Gafëën ku hii i hati te a taki wan soni. Luku bunu taa ja fia ku ën.
Fiti iseei a di sëmbë. Ee a dë fanöudu, tooka di soni di i bi o taki, nöö taki u dee soni dee ta dëën booko hedi. An o taanga sö kumafa i mëni, u di dee talakitaati ku dee buku fuu ta taki u sömëni soni. Ee i go a wan juu ka di sëmbë ta du soni, nöö hoi di soni dë a pakisei, na fan longi poi.

Pooba di soni aki di liba aki:

Te i ta hoi di wosudendu dini fii, nöö hoi wan demo ka i ta tooka di soni di i bi o taki, u di wan sëmbë di i ta peleiki da taki u wan woto soni. I sa du di soni aki a di peleikiwooko tu.
A so u dee peleikiwooko komakandi, di baaa di ta tei fesi sa taki nasö hoi wan demo di ta lei u unfa u sa lei taa u ta booko u hedi ku wotowan a di peleikiwooko.