Lei sëmbë soni u Bëibel a wan bunu fasi
1. Un faantiwöutu peleikima di ta lei sëmbë soni u Bëibel abi?
1 Wan sëmbë an sa ko dini Jehovah ee na Jehovah seei „hai ën ko” (Joh. 6:44). Ma tökuseei, wan peleikima di ta lei sëmbë soni u Bëibel musu mbei möiti u heepi de u ko dë mati ku di Tata u de di dë a liba ala (Jak. 4:8). Fëën mbei u musu ta seeka useei bunu. Di lesi di woo ta lesi dee palaglaaf, ta buta hakisi, an tjika u mbei wan sëmbë ko fusutan di bunu buka, söseei u mbei a go a fesi a di lei.
2. Un wini a o tja ko te u ta lei sëmbë soni u Bëibel a wan bunu fasi?
2 Ee wan peleikima kë lei sëmbë soni u Bëibel a wan bunu fasi, nöö a musu heepi de u (1) ko fusutan andi di Bëibel ta lei, (2) biibi dee soni Bëibel ta lei, ku (3) du dee soni Bëibel ta lei (Joh. 3:16; 17:3; Jak. 2:26). A sa tei sömëni liba u heepi wan sëmbë u du dee soni aki. Ma hiniwan u dee soni aki sa heepi di sëmbë u ko dë mati ku Jehovah, söseei u buta hën libi a Jehovah maun.
3. Faandi mbei wan bunu leima ta buta hakisi da wan sëmbë di a ta lei?
3 Unfa di sëmbë di i ta lei soni u Bëibel ta pakisei?: Ee i kë sabi ee di sëmbë ta fusutan di soni di i ta lei ën, söseei ee a ta biibi ën, nöö na i wanwan musu ta fan, ma mbei hënseei taki andi a ta fusutan (Jak. 1:19). A ta fusutan andi di Bëibel ta taki u di woto di i ku ën ta luku ö? A sa taki andi a fusutan u di woto dë u? Unfa a ta pakisei u dee soni dee a ta lei? A ta biibi taa dee soni di di Bëibel ta lei da tuutuu soni ö? (1 Tes. 2:13) A ta fusutan taa dee soni dee a ta lei musu dë u si a di fasi fa a ta libi ö? (Kol. 3:10) A dë fanöudu u hakisi di sëmbë soni a wan koni fasi, ee u kë ko sabi unfa a ta pakisei u dee hakisi aki. Nöö haika te a o piki.—Mat. 16:13-16.
4. Andi u musu du ee u si taa a ta taanga da wan sëmbë u fusutan nasö u du dee soni dee a ta lei a Bëibel?
4 Soni di sëmbë guwenti u du ku di fasi fa de guwenti u pakisei ta taanga u disa (2 Kol. 10:5). Ma andi u musu du ee di sëmbë di u ta lei soni an ta biibi nasö an ta du dee soni dee a ta lei? U musu abi pasensi ku di sëmbë, sö taa di Wöutu u Gadu ku di santa jëjë fëën sa wooko nëën hati (1 Kol. 3:6, 7; Heb. 4:12). Ka fuu duwengi ën, a bi o möön bunu fuu bia taki u wan woto soni ee u si taa wan soni ta taanga dëën u fusutan nasö ee a ta taanga dëën u fiti wan lei u Bëibel. Ee u ta lei ën soni u Bëibel a wan lobihati fasi, söseei ku pasensi, nöö te u kaba fëën a o du dee soni dee a musu du.