Di Teokalasia-siköö u di jaa 2015 o heepi u fuu lei sëmbë soni a wan möön bunu fasi

¹ Di Psalöm sikifima Dafiti bi sikifi: „Be dee soni dee mi ta taki ku mi buka ku dee soni dee mi ta pakisei fundu a mi hati dendu, ko dë soni dee i feni bunu. Jehovah, ju da mi sitonu kuun. Ju ta tjubi mi” (Ps. 19:14). Wë useei kë taa dee soni dee u ta taki ta kai ku Jehovah, u di u ta si di gaandi di u abi u taki tuu soni te u dë a zali ku te u dë a di peleikiwooko kuma wan gaan soni. Di Teokalasia-siköö da wan u dee soni di Jehovah seti u heepi u fuu sa du di peleikiwooko. Hiniwan wiki di Teokalasia-siköö ta hoi a möönleki 111.000 kemeente di dë a hii së u goonliba. A heepi sömëni baaa ku sisa u ko toon möön bunu peleikima u di bunu buka, u ko sa u lei sëmbë a wan bunu fasi, söseei u ko abi degihati u peleiki.​—Tjab. 19:8; Kol. 4:6.

² A di skeima u di Teokalasia-siköö u di jaa 2015 woo abi taki di tei puu a di brochure „San Gado wortu e leri wi?” (igw) ku di pisi „Wortubuku” di dë u feni a di Nyun-Grontapuvertaling (bladsëidë 2468). Söseei woo abi taki di tei puu a dee Waktitoren nasö a woto buku kuma „Preiki finifini” fu Gado Kownukondre (bt), Teki na eksempre fu sma di ben abi bribi (ia), ku Dee woto u di Bëibel (My). Böiti di dë, di ten di wan sëmbë bi ta kisi u hoi di lesipisi u Bëibel, ku taki nö. 1, tooka. A dee palaglaaf dee ta ko woo go luku dee soni dee tooka, söseei dee lai dee u kisi dee ta lei u fa u musu hoi dee pisi u di siköö.

³ Lesipisi u Bëibel: Dee baaa dee kisi di gaandi u hoi di pisi aki, kisi tu miniti u taki u wan soni di de bi feni a di lesipisi u Bëibel di wiki dë. Ee de kë lei di kemeente wan bunu soni a tu miniti dendu, nöö de musu seeka deseei bunu. Baka di dë, di kemeente o kisi sikisi miniti u taki andi de bi feni a di lesipisi u Bëibel. Ma hiniwan sëmbë musu taki a 30 sekönde dendu andi a bi lei. U musu ta seeka useei bunu ee u kë taki a 30 sekönde dendu andi u lei. Di soni aki ta mbei woto baaa ku sisa feni ten tu, u taki andi de bi lei.

⁴ Taki Nö. 1: Nöunöu di taki aki ta hoi dii miniti nasö möön biti, nöö di pisi di de ta lesi an ta hia sö möön. Dee wan dee kisi wan pisi u lesi musu lesi ën sömëni pasi ku wan taanga töngö. Söseei de musu luku taa de ta kai dee wöutu bunu, ta lesi di pisi liii, sö taa de sa lesi ën bunu. Hii dee dinima u Jehovah musu ta mbei möiti u lesi bunu, u di lesi da wan fanöudu soni a di dini di u ta dini Gadu. U ta wai seei u di sömëni u dee mii fuu ta lesi bunu. U ta gafa dee mama ku dee tata u di möiti di de ta mbei u heepi dee mii u de u ko dë bunu lesima.

⁵ Taki Nö. 2: Wan sisa hën ta hoi di taki aki, nöö a ta hoi ën feifi miniti. A musu wooko ku di në u di taki. Te wan taki tei puu a di Nyun-Grontapuvertaling, nöö di taki musu hoi kumafa a ta pasa tuutuu a di peleikiwooko, söseei wotowan musu sa si fa de sa wooko ku ën a di pisiwata ka de ta peleiki. Te di taki nama ku wan sëmbë u Bëibel di wan Waktitoren nasö wan woto buku ta taki fëën, nöö di sisa musu lesi di woto di sikifi a basu ka di në u di sëmbë sikifi. A musu tei dee söifi Bëibel tëkisi di nama ku di woto, nöö a musu lei dee haikama andi de sa lei u di sëmbë di di woto ta taki fëën. A sa wooko ku woto tëkisi tu di nama ku di në u di taki. Di siköö-gaanwomi o dëën wan sëmbë fëën ku ën hoi di taki.

⁶ Taki Nö. 3: Wan baaa nasö wan sisa hën ta hoi di taki aki, nöö de ta hoi ën feifi miniti. Te wan sisa o hoi di taki aki, nöö a musu hoi ën kumafa taki nö. 2 ta hoi. Te wan baaa o hoi di taki aki di tei puu a wan Waktitoren nasö wan woto buku, nöö a musu hoi ën kumafa de ta hoi wan taki a zali da dee haikama. Di baaa musu tja di në u di taki gbelingbelin ko a fesi da dee haikama, a musu tei dee söifi Bëibel tëkisi di nama ku di woto, nöö a musu lei dee haikama andi de sa lei u di sëmbë di di woto ta taki fëën.

⁷ Wan njunjun fasi fa dee baaa o ta hoi taki nö. 3: Te di taki tei puu a di Nyun-Grontapuvertaling, nöö a musu hoi ën kuma te a ta hoi di wosudendu dini ku dee sëmbë fëën nasö kuma te a dë a peleikiwooko. Ma di siköö-gaanwomi hën o suku wan sëmbë dëën fëën ku ën hoi di taki, söseei a o piki ën na un fasi a musu hoi di taki. Di sëmbë di hën ku ën o hoi di taki musu dë wan sëmbë fëën wosudendu, nasö wan baaa u di kemeente. A sa wooko ku woto tëkisi tu di nama ku di në u di taki. So juu wan gaanwomi sa kisi di gaandi u hoi di pisi aki. Dee gaanwomi seei sa luku ambë de o tei u hoi di taki, söseei na un fasi de o hoi di taki. Di soni aki o da di kemeente degihati seei u si fa dee gaanwomi ta lei taa de abi di köni u lei sëmbë soni, te de ta hoi di taki aki ku de wosudendu nasö ku wan woto baaa.

⁸ Lai: Baka hiniwan taki di wan sëmbë hoi, di siköö-gaanwomi o tei tu miniti u dëën lai, söseei u gafëën u di taki di a bi hoi. Nöö a o dëën lai di tei puu a di Kisi wini fu a Theokrasia Diniwroko-skoro-leribuku di o heepi ën. Te di siköö-gaanwomi o kai wan sëmbë di musu hoi wan taki, nöö an o kai di nöbu di di sëmbë musu wooko nëën. Te wan sëmbë kaba hoi wan taki, nöö di siköö-gaanwomi o gafëën u di taki di a bi hoi, baka di dë a o kai di nöbu di di sëmbë bi musu wooko nëën. A o taki faandi mbei di sëmbë wooko bunu a di nöbu, nasö a o piki di sëmbë a wan sutifasi faandi mbei a bunu taa a wooko a di nöbu dë baka.

⁹ Dee lai dee wan sëmbë ta kisi te a hoi wan taki, dë u feni a bladsëidë 79 te go miti bladsëidë 81 u di Diniwroko-skoro-leribuku. Baka te wan sëmbë kaba hoi wan taki, nöö di siköö-gaanwomi o maaka a di buku u di sëmbë taa a bi hoi di taki bunu, söseei a o hakisi ën ee a bi du di soni di sikifi a di pisi „Pruberi fu du disi”, ma an o hakisi ën a woto sëmbë dendu. Baka di komakandi nasö wan woto daka, di siköö-gaanwomi sa gafëën, söseei dëën lai di o heepi ën. Dee sëmbë dee ta hoi taki a di siköö musu si dee lai di de ta kisi kuma wan soni di o heepi de u go a fesi a di biibi.​—1 Tim. 4:15.

¹⁰ Ee wan sëmbë pasa di juu, nöö di siköö-gaanwomi nasö di baaa di ta heepi ën musu dë kabakaba u du wan soni u lei di sëmbë taa di juu dou, kandë ku wan alarm nasö wan woto soni. Te di alarm bai nasö te di siköö-gaanwomi du wan soni u lei taa di juu dou, nöö di sëmbë di ta hoi di taki musu kaba di pisi di a bi ta taki dë, nöö a kumutu a di podium.​—Luku bld. 282, pal. 4 u di Diniwroko-skoro-leribuku.

¹¹ Hiniwan sëmbë di dou dee maaka u butëën në a di Teokalasia-siköö, ta kisi di kai u du ën. (Luku bld. 282, pal. 6 u di Diniwroko-skoro-leribuku.) Dee soni di dee dinima u Jehovah lei a di siköö aki heepi de u peleiki, söseei u lei sëmbë soni u di bunu buka di nama ku di Könuköndë a wan fajafaja fasi, a wan lesipeki fasi, söseei ku lobi. Jehovah ta feni ën bunu seei u di hii dee sëmbë dee ta feni gaan wini u di Teokalasia-siköö ta gafëën!​—Ps. 148:12, 13; Jes. 50:4.