Meki Gado tan lobi yu
1. Faandi mbei de tja di buku Meki Gado tan lobi yu ko a döö?
1 A di wiki u 15 u höndima-liba u di jaa 2015, u bi bigi lei soni a di buku Meki Gado tan lobi yu a di Kemeente Bëibel-lei. Nöö hii sëmbë bi wai seei. A kaba u di biifi di di Tii Kulupu sikifi da dee sëmbë dee lobi Jehovah, a sikifi taa: „Ku hii u hati u ta biibi taa di buku aki sa heepi unu fuun libi ku di tuutuu lei u Bëibel go dou, sö taa un sa hoi unuseei ’a di lobi u Gadu dendu nöö woon feni di libi u teego’.—Jud. 21.”
2. Ku andi di buku aki o heepi u?
2 Dee soni dee woo lei a di buku aki: Unfa dee mama wëti u Bëibel sa heepi u te u musu tei mati, te u musu mbei piizii, a dee soni dee u guwenti u du, ku te u musu lesipeki lanti? Söseei unfa de sa heepi u a soni di nama ku di toou libi, ku di fasi fa u musu fan ku wotowan, ku dee soni di sëmbë guwenti u du? Dee wëti dee dë a di Wöutu u Gadu hei möön hii woto wëti, nöö de o tii di háti fuu, sö taa u sa libi a wan leti fasi (Ps. 19:7, 8). Te u ta ko fusutan möön bunu unfa Jehovah ta pakisei, nöö woo kë piki hën buka a hii soni, u di u kë du soni di ta kai ku ën.—Nöng. 27:11; 1 Joh. 5:3.
3. Faandi mbei u musu mbei hii möiti fuu ta da piki hiniwan wiki a di Kemeente Bëibel-lei?
3 Dë kabakaba u da piki: I musu abi di maaka u gafa Jehovah te i ko makandi ku dee sëmbë fëën (Heb. 13:15). Hii di kemeente o lei soni a di buku aki. U di wa o ta du hia palaklafu wan pasi, mbei hii u tuu o sa seeka useei möön bunu a fesi, fuu sa konda da wotowan andi u lei. Dee sati piki fuu o da wotowan degihati u ta lobi deseei ta du bunu wooko. Söseei de o mbei hii sëmbë piizii u ta lei soni makandi (Heb. 10:24). Boiti di dë, woo ta möön piizii tu te hiniwan fuu ta konda unfa a ta biibi tjika.
4. Faandi mbei a dë fanöudu fuu hoi dee wëti u Jehovah?
4 Di ndeti ufö de kii Jesosi, a bi taki taa a dë fanöudu u hoi dee wëti u Jehovah ee u kë hoi useei a di lobi fëën dendu (Joh. 15:10). Di Gado lobi-buku o heepi u fuu dë kabakaba u mbei möön möiti fuu ta libi ku dee mama wëti u Bëibel hiniwan daka, sö taa u sa hoi useei a di lobi u Gadu dendu.—Jud. 21.