DI LIBI FUU KUMA KEESITU SËMBË
I musu ta piizii u di i ta paaja di bunu buka
A ta taanga da i fii ta peleiki ö? Sömëni fuu bi o taki aai. Ma faandi mbei? Kandë u di dee sëmbë a di pisiwata ka u ta peleiki ta kuutu u nasö ta ligei ku u nasö kandë u ta fëëë u fan ku sëmbë di wa sabi. Nöö dee soni aki sa mbei taa wa ta piizii möön. Ma tökuseei u ta dini di piizii Gadu fuu di kë taa u musu ta piizii te u ta wooko dëën (Ps 100:2; 1Ti 1:11). Andi da dii soni di musu mbei u ta piizii te u ta peleiki?
Di fosu soni, hën da u ta paaja wan buka di ta da sëmbë kötöhati. Hii fa sëmbë u di goonliba aki ta lasi hati, tökuseei u sa mbei de fii bunu te u ta konda wan „bunu buka u wan möön bunu soni” da de (Jes 52:7). Ma di bunu buka u di Könuköndë sa mbei useei ta fii bunu tu. Ufö i go peleiki, i musu kai pakisei a dee bunu soni di di Könuköndë u Gadu o tja ko da u.
Di tu soni, hën da di bunu buka di u ta paaja ta tja wini ko da sëmbë a hii futu, söseei a ta mbei de ko dë gaan mati ku Gadu. De ta lei u disa dee hogi libi u de, u de sa feni di libi u teego (Jes 48:17, 18; Lo 1:16). U ta si useei taa u dë a wan wooko ka u ta suku sëmbë fuu heepi de u de an lasi de libi. Hii fa so sëmbë an kë fuu heepi de, tökuseei wa ta disa u suku dee sëmbë dee kë.—Mt 10:11-14.
Di u dii soni di dë di möön fanöudu soni, hën da di peleiki di u ta peleiki ta tja gafa ko da Jehovah. A ta tei di peleiki di u ta peleiki u bigi seei (Jes 43:10; Heb 6:10). Söseei a ta da u di santa jeje fëën di ta heepi u fuu du di wooko. Fëën mbei, begi Jehovah faa heepi i fii ta piizii, u di di soni dë da wan u dee fasi di di jeje fëën ta mbei sëmbë ko abi (Ga 5:22). Te a ta heepi u, nöö wa o ta fëëë möön, ma woo ta peleiki ku degihati (Tja 4:31). Boiti di dë, woo ta piizii u du di wooko aki aluwasi dee sëmbë u di pisiwata ka u ta peleiki an kë haika u.—Eze 3:3.
Unfa i bi o ta kë du di peleikiwooko? Unfa i sa lei taa i ta du di peleikiwooko ku piizii?
LUKU DI FËLÖN KO DË KU PIIZII BAKA U DI I TA LEI ISEEI SONI U BËIBEL, SÖSEEI U DI I TA PAKISEI FUNDU U DEE SONI DEE I TA LEI, NÖÖ UN PIKI DEE HAKISI AKI:
Faandi mbei u musu mbei tei ten fuu ta lei useei soni u Bëibel, aluwasi u ta tei gaansë u di ten fuu u ta du di peleikiwooko hiniwan liba?
Naandi u musu djeesi Mary?
Na un ten i ta pakisei fundu u dee soni dee i ta lei a di Wöutu u Gadu?
Andi ta mbei i ta piizii te i ta paaja di bunu buka?