Kula sëmbë a di Saba daka

3:1-5

Faandi mbei a bi ta hati Jesosi u di fasi fa dee hedima u di Dju keiki bi ta libi? U di de bi mbei di Saba daka ko dë kuma wan hebi. De bi buta sömëni pikipiki wëti ko a dendu. Wan u dee wëti bi ta taki taa sëmbë an bi musu kii wan wënwën a Saba daka. Ja bi musu kula wan sëmbë, boiti ee a bi dë u dëdë. Di soni aki bi kë taki taa ee wan kamian u wan sëmbë bi booko a Saba daka, nöö de an bi musu kulëën. A bi dë gbelingbelin u si taa dee hedima u di Dju keiki an bi ta booko de hedi ku di womi di bi siki a wan së maun fëën.