Andi sëmbë ta taki u di begi di de ta begi Gadu?
„Te mi ta begi, nöö mi ta fii taa Gadu dë a mi bandja ta panjan mi a maun hoi, nöö a ta lei mi andi mi musu du te ma saandi mi musu du.”—MARÍA.
„Mi mujëë mbei möiti 13 jaa longi ku di kankël di bi kisi ën. Te u kaba fëën, a ko lasi libi. Mi ta mëni jeti fa mi bi ta begi Gadu hiniwan daka faa heepi mi, nöö mi bi ta si taa a bi ta haika mi tuutuu. Mi bi ta fii bunu.”—RAÚL.
„Wan gaan bunu wë Gadu da u taa u sa ta begi ën.”—ARNE.
María, Raúl, Arne, ku sömëni woto sëmbë jeti, ta si di begi di u sa ta begi kuma wan apaiti soni. Te de ta begi Gadu, nöö de sa ta fan ku ën, de sa ta dëën tangi, söseei de sa ta feni heepi nëën. Ku hii de hati de ta biibi di soni aki di di Bëibel ta taki di nama ku di begi di u sa ta begi Gadu: „U sabi tu taa te u begi ën wan soni, nöö ee di begi kai ku di pakisei fëën, nöö a o jei.”—1 Johanisi 5:14.
Ma sömëni woto sëmbë an ta biibi di soni di di Bëibel ta taki u begi. Wan womi de kai Steve, bi taki unfa a bi ta si begi. A bi taki taa: „Di mi bi abi 17 jaa, hën dii mati u mi lasi libi a tu hogi di bi pasa. Wan u de lasi libi di di wagi ka a bi dë nëën dendu bi naki, nöö tu wotowan bi dëdë a wata.” Andi Steve bi du? „Mi bi begi Gadu faa piki mi faandi mbei hii dee soni aki bi pasa, ma an piki mi. Hën mi bi ko ta hakisi miseei ee faandi mbei mi musu begi. Sömëni sëmbë ta si kuma Gadu an ta piki dee begi u de, nöö fëën mbei de ta hakisi deseei ee de musu ta begi jeti.
Woto soni dë jeti di ta mbei so sëmbë ta si kuma begi aan heepi da de. So u de ta taki taa u di Gadu sabi hii soni, mbei a sabi andi u abi fanöudu, ku andi ta da u bookohedi. Fëën mbei de ta taki taa an dë fuu ta piki ën dee soni dë möön.
Woto sëmbë ta biibi taa Gadu an ta kë piki de te de begi ën, u di de bi mbei föutu a de libi. Wan mujëë de kai Jenny bi taki taa: „Di soni di ta möön mi, hën da mi ta si kuma ma bunu tjika. Mi bi du soni di ma bi musu du, nöö mi ta taki a miseei taa ma bunu tjika u Gadu haika mi te mi ta begi ën.”
Unfa i ta si di begi di u sa ta begi? Ee a bi pasa taa sö iseei bi ta si soni kumafa dee sëmbë aki bi ta si soni, nöö i sa dë seiki taa di Bëibel sa lei u unfa soni dë tuutuu. U sa biibi andi di Bëibel ta taki u di begia di u sa ta begi Gadu. A sa heepi i fii ko sabi dee soni aki:
Gadu ta haika u te u ta begi ën u?
Faandi mbei Gadu an ta piki so begi di sëmbë ta begi ën?
Unfa i sa begi te nöö Gadu jei dee begi fii?
Unfa begi sa heepi i tjika?
a Sömëni begi u dinima u Gadu sikifi a di Bëibel, te kisi dee u Jesosi Keesitu. A di pisi u Bëibel di de ta kai di Awoo Buka, i abi möön leki 150 begi.