Soni di dee lesima hakisi
Andi Jesosi bi kë taki di a bi taki taa: „Wan pakisei taa mi ko u tja bööböö libi ko”?
Jesosi bi ta lei sëmbë u de ta libi fiifii ku deseei. Ma wan daka, hën a bi piki dee apösutu fëën taa: „Wan pakisei taa mi ko u tja bööböö libi ko a goonliba e. Ma ko u tja bööböö libi ko, ma mi ko u tja feti ufangi ko. Biga fu mi hedi wan womi mii ku hën tata o kisi gaan toobi, wan mujëë mii ku hën mama o kisi gaan toobi, söseei mai ku mai o kisi gaan toobi” (Mat. 10:34, 35). Wë nöö andi Jesosi bi kë taki ku di soni aki?
Na paati Jesosi bi kë paati sëmbë ku sëmbë sö, ma a bi sabi taa dee soni dee a bi ta lei sëmbë bi o tja paati ko a so wosudendu. Fëën mbei dee sëmbë dee kë waka a Jesosi baka, söseei dee kë dopu, musu hoi a pakisei taa so juu so u dee famii u de an o wai ku di soni aki. A sa ta taanga da de u de piki Jesosi buka, u di kandë de mujëë nasö de manu, nasö woto sëmbë u di famii o ta du ku de.
Di Bëibel ta da Keesitu sëmbë taanga u de biinga „u libi fiifii ku hii sëmbë” (Lom. 12:18). Ma dee soni dee Jesosi lei sëmbë, sa ko dë kuma wan „feti ufangi” a so wosudendu. Di soni aki sa pasa te wan sëmbë u wan wosudendu kë waka a Jesosi baka, hii fa dee wotowan an lo’ dee lei u Jesosi. Ee a ko pasa sö, nöö dee sëmbë u di wosudendu aki ta ko toon „gaan felanti” u di sëmbë di ta tei di tuutuu lei.—Mat. 10:36.
So juu dee bakama u Jesosi dee ta libi a wan wosu ku sëmbë di dë a wan woto keiki, musu taki ee de o du soni u Jehovah ku Jesosi wai ku de, nasö ee de o du soni u mbei dee famii u de wai ku de. Kandë wan sëmbë u di famii u de di an ta dini Jehovah o ta duwengi de u de hoi wan piizii daka di nama ku poipoi biibi. Wë te a pasa sö, nöö de musu luku ambë de o haika. Jesosi bi taki taa: „Ee wan sëmbë lobi hën mama ku ën tata möön mi, nöö di sëmbë dë an bunu tjika u waka a mi baka” (Mat. 10:37). Jesosi an bi kë taki taa dee sëmbë dee kë toon bakama fëën an musu lobi dee sëmbë u de wosudendu möön. Ma a bi ta heepi de u de ko fusutan andi musu dë di möön fanöudu soni a de libi. Ee dee famii fuu ta tapa u fu wa dini Jehovah, tökuseei woo ta lobi de go dou, ma woo ta hoi a pakisei taa di lobi di u lobi Jehovah da di möön fanöudu soni.
A ta hati u te dee famii fuu ta du ku u. Ma dee bakama u Jesosi musu hoi dee soni di Jesosi bi taki a pakisei. A bi taki taa: „Hiniwan sëmbë o abi fëën sitaafu di a musu tjai ee a o ko waka a mi baka. Nöö ee ja kë tja di sitaafu dë, nöö ja fiti fii dë wan bakama u mi e” (Mat. 10:38). Fuu taki ën woto fasi, nöö Keesitu sëmbë ta si di du di dee famii u de ta du ku de, kuma wan u dee sitaafu di de musu tja, u di de ta waka a Jesosi baka. Ma de ta biibi taa di bunu fasi fa de ta tja deseei sa mbei taa dee famii u de di an ta dini Jehovah, ko ta si soni woto fasi, söseei a sa mbei de kë ko sabi soni u di Bëibel.—1 Pet. 3:1, 2.