Gadu bi ta da sëmbë paadon ufö Jesosi ko dëdë paka di lusupaima da u

U di Jesosi dëdë paka paima da u, mbei u sa feni paadon u dee zöndu fuu (Ef. 1:7). Ma tökuseei di Bëibel ta taki taa: „U di Gadu bi abi pasensi mbei a bi ta da sëmbë paadon a di ten di pasa,” a bi ta du di soni aki ufö Jesosi bi ko dëdë paka paima da u (Lom. 3:25). Unfa Jehovah bi sa du di soni aki ee a dë wan Gadu di ta du soni a wan leti fasi tuutuu?

Da Jehovah, nöö di lusupaima bi paka kaa, di a bi buta taa a o seti soni u di mii fëën ko dëdë paka di paima da libisëmbë (Ken. 3:15; 22:18). Gadu bi dë seiki taa te di juu bi dou, nöö di wan kodo womi mii fëën bi o paka di lusupaima (Gal. 4:4; Heb. 10:7-10). Di Jesosi bi dë a goonliba aki, nöö Jehovah bi dëën di makiti u da sëmbë paadon u dee zöndu u de, hiifa an bi paka di lusupaima jeti. Jesosi bi sa da sëmbë di bi ta buta biibi nëën paadon u dee zöndu u de, u di a bi sabi taa di lusupaima di a bi o paka bi o tjika u puu dë a zöndu basu.​—Mat. 9:2-6.