Suku wan bunu kamian ka i sa lei soni u Bëibel

I kë möön feni wini u di lei di i ta lei soni u Bëibel ö? Wë dee soni dee woo taki aki sa heepi i fii i sa ta dë ku hii i pakisei te i ta lei soni u Bëibel.

• Suku wan bunu kamian. Ee a kan, nöö suku wan kamian di dë limbolimbo, söseei di dë ku fajalimbo, sö taa i sa si andi i ta lesi. I sa sindo a wan tafa fesi, nasö i sa suku wan kamian a döö ka i ta fii taa i dë bunu.

• Suku wan kamian ka i sa dë i wanwan. Jesosi bi ta hopo fuukufuuku „mamate” go begi „a wan kamian piii hën wanwan” (Maik. 1:35). Ee ja ta feni pasi u dë i wanwan, nöö i sa mbei dee sëmbë fii wosudendu, nasö dee sëmbë dee i ku de ta dë a wan wosu sabi di daka ku di juu di i ta lei soni u Bëibel. I sa piki de be de an kai i a di pisiten dë.

• Dë ku hii i pakisei. Na mbei soni puu i pakisei. Ee i ta wooko ku tëlëfön, nasö tablet, nöö i sa butëën a sö wan fasi taa an sa bai, nasö i sa zin a di piki opalani di dë a di tëlëfön fii dendu. Ee di i bigi u lei soni u Bëibel hën i ko pakisei taa i bi abi wan soni u du, nöö i sa sikifi ën buta a wan pampia, sö taa i sa du ën bakaten. Ee a ta taanga da i fii buta hii i pakisei a di soni di i ta lei, nöö i sa böö kölö sö. I sa go waka pikisö, nasö i sa hopo taanpu tëndë.