Noa ta mbei wan Ark

NOA bi a’ wan mujëë ku dii womi mii. Dee womi mii fëën në da Semi, Kam ku Jafëti. Nöö hiniwan u dee womi mii dë bi a’ wan mujëë. Hën da aiti sëmbë bi dë a di wosudendu u Noa.

Gadu bi mbei Noa du wan apaiti soni. A bi piki ën faa mbei wan gaan ark. Di ark bi bigi kuma wan sipi, ma a bi möön djei wan gaan langa këdë. Gadu bi piki Noa taa a bi musu ’mbei di ark dii södö hei ku goon’, nöö a bi musu ’paati ën a kambakamba’. Dee kamba bi dë da Noa ku di wosudendu fëën, dee mbeti ku di njanjan di de bi o a’ fanöudu.

Söseei Gadu bi piki Noa faa mbei di ark a sö wan fasi taa wata an sa pasa go nëën dendu. Gadu bi taki taa: ’Mi o mbei wan gaan wata ko poi hii di goonliba. Di sëmbë di an dë a di ark dendu o dëdë.’

Noa ku dee womi mii fëën haika Jehovah, hën de bigi mbei di ark. Ma dee woto sëmbë bi ta lafu de. De bi ta du hogi go dou. Na wan sëmbë bi biibi Noa di a bi piki de andi Gadu bi o du.

A bi tei longi u mbei di ark u di a bi bigi seei. Baka sömëni jaa ufö de bi kaba mbei ën. Hën Gadu piki Noa faa tja dee mbeti go a di ark dendu. Gadu piki ën taa a musu tja tu u so u dee mbeti, wan womi wan ku wan mujëë wan. Ma u woto sootu pei mbeti a musu tja seibi go a di ark dendu. Söseei Gadu bi piki Noa faa tja hii dee tookatooka pei fou go a dendu tu. Noa bi du leti kumafa Gadu bi piki ën.

Te u kaba fëën Noa ku ën wosudendu seei go a di ark dendu. Hën wë Gadu tapa di döö gbolo. Noa ku di wosudendu fëën bi dë a di ark dendu ta wakiti. Pakisei taa i dë ku de a di ark dendu ta wakiti. Wan gaan wata bi o ko tuutuu kumafa Gadu bi taki ö?