Tu mii di bi tooka seei

LUKU dee tu womi mii a di peentje aki. Ja feni taa de tooka seei ö? I sa’ në u de u? Di höndima da Esau, nöö di ta luku sikapu da Jakopu.

Esau ku Jakopu da tulingi mii u Isaki ku Lebeka. De tata Isaki lobi Esau gaanfa, u di a dë wan bunu höndima di ta tja gbamba ko a wosu. Ma Lebeka möön lobi Jakopu, u di a dë pii sö, nöö an ta dëën bookohedi.

De avo Abahamu bi dë a libi jeti. Nöö i sa pakisei fa Jakopu bi lo’ u sindo haika te Abahamu bi ta taki soni u Jehovah. Te u kaba fëën Abahamu dëdë di a bi abi 175 jaa, nöö di ten dë dee mii bi a’ 15 jaa.

Di Esau bi a’ 40 jaa, a toou ku tu mujëë u di köndë Kaana. Di soni aki bi mbei Isaki ku Lebeka tjali seei, u di dee mujëë dë an bi ta dini Jehovah.

Hën de dë te wan daka, wan soni pasa di mbei taa Esau hati boonu seei ku ën baaa Jakopu. Di juu bi dou taa Isaki bi musu mbei di möön gaan womi mii fëën feni di bunu u Gadu. U di Esau bi dë di möön gaan wan, mbei a bi ta wakiti faa feni di bunu dë. Ma Esau bi sei di leti fëën di a bi abi kuma di möön gaan womi mii, da Jakopu. Boiti di dë di Lebeka pai dee tu womi mii aki, Gadu bi taki taa Jakopu hën bi o feni di bunu dë. Nöö di soni dë hën bi pasa tu. Isaki da Jakopu di bunu di Esau bi musu feni.

Bakaten di Esau ko jei andi pasa, hati fëën boonu seei. Hati fëën boonu sö tee taa a bi taa a o kii Jakopu. Di Lebeka jei di soni dë, hati fëën latja seei. Fëën mbei a piki hën manu Isaki taa: ’A o bigi a mi ee Jakopu seei toou ku wan mujëë u Kaana.’

Hën wë Isaki kai hën womi mii Jakopu. Hën a piki ën taa: ’Jakopu o, na tei mujëë a Kaana toou e. Go a i avo Betuëli a Halan, a di wosudendu u di womi mii fëën Laban, nöö toou ku wan u dee sisa fii.’

Jakopu haika hën tata. Wantewante sö a tei di langa pasi hai go a dee famii fëën a Halan.