Tu degihati mujëë

TE SONI miti dee Isaëli sëmbë, nöö de ta bai kai Jehovah. Jehovah ta piki de u di a ta da de degihati fesima u heepi de. Di Bëibel ta kai de kuutuma. Josua da di fosu kuutuma. Wan tu u dee kuutuma di ko nëën baka da Otiniëli, Ehutu ku Samgali. Ma tu u dee sëmbë di heepi Isaëli da tu mujëë de kai Debola ku Jaëli.

Debola da wan tjabukama u Gadu. Jehovah ta piki ën soni a fesi, nöö a ta piki dee sëmbë andi Jehovah taki. Debola da wan kuutuma tu. A ta sindo a wan palo basu a dee kuun kamian, nöö sëmbë ta ko ku dee fuka u de u suku heepi nëën.

A di ten dë Jabini bi dë di könu u Kaana. A abi 900 feti wagi. Dee sodati fëën taanga sö tee taa de musu dee Isaëli sëmbë ko toon saafuma u Jabini. Di hedima u dee sodati u Jabini da Sisela.

Wan daka Debola manda kai kuutuma Baaki, hën a piki ën taa: ’Jehovah taa: „Tei 10.000 womi, nöö tja de go a di kuun de kai Tabolu. Naandë mi o tja Sisela ko da i. Nöö mi o mbei i wini ën ku dee sodati fëën.”’

Hën Baaki piki Debola taa: ’Mi o go ee i ko ku mi.’ Debola go ku ën, ma a piki Baaki taa: ’Na ju o wini di feti, biga Jehovah o mbei wan mujëë kii Sisela.’ Nöö sö a pasa tuu.

Baaki bazia Tabolu Kuun go miti dee sodati u Sisela. Te u de kë mëni, Jehovah mbei wan gaan wata ko, hën sömëni u dee sodati u Sisela dëdë a wata. Ma Sisela djombo kumutu nëën feti wagi, kule go.

Baka wan pisiten, Sisela ko dou a Jaëli wosu. Jaëli kai ën ko a wosu, hën a dëën pikisö mëiki a bebe. Di mëiki mbei duumi kisi ën, hën te wan pisi a duumi piii. Hën wë Jaëli tei wan tjöni buka papai, hën a tjökö di hogihati womi aki fula hën hedi. Baka di Baaki ko dou, hën a lei ën di dëdëdëdë sinkii u Sisela! Sö i ta si taa di soni Debola taki, pasa tuutuu.

Te u kaba fëën de kii Könu Jabini tu, nöö dee Isaëli sëmbë böö u wan pisiten.