Luti ku Naomi

DI BËIBEL abi wan buku de kai Luti. Di buku dë ta konda wan woto u wan famii di bi ta libi a di ten di Isaëli bi a’ kuutuma. Luti da wan njönku mujëë u di köndë Moab. An dë u di nasiön u Gadu, de kai Isaëli. Ma di Luti ko lei soni u di tuutuu Gadu, Jehovah, hën a ko lobi ën seei. Naomi möön gaandi, nöö hën heepi Luti u ko lei soni u Jehovah.

Naomi da wan Isaëli mujëë. Hën ku ën manu ku dee tu womi mii fëën bi foloisi go a di köndë Moab di hangi pena bi dë a Isaëli. Te wan daka, hën Naomi manu ko dëdë. Bakaten dee womi mii u Naomi toou ku tu Moab mujëë. Wan u dee mujëë da Luti, di wotowan da Olupa. Ma baka söwan 10 jaa, hën dee tu womi mii u Naomi ko dëdë. Naomi ku dee tu mai fëën bi tjali seei! Andi Naomi o du?

Wan daka hën Naomi feni taa a o tei di longi pasi toona go baka a dee sëmbë fëën. Luti ku Olupa kë tan ku Naomi, fëën mbei de go ku ën tu. Ma baka di de waka te dou wan pisi, hën Naomi bia luku dee mujëë hën a piki de taa: ’Un toona go baka a unu wosu go tan ku unu mama.’

Naomi bosi dee mujëë da de adjoisi. Hën de bigi ta këë, biga de lobi Naomi seei. De piki ën taa: ’Nönö, woo go ku i a dee sëmbë fii.’ Ma Naomi piki de taa: ’Dee mii o, un toona go baka e. A möön bunu un tan a unu wosu.’ Hën Olupa toona go fëën baka a wosu. Ma Luti an go.

Naomi bia luku Luti, hën a piki ën taa: ’Olupa toona go kaa. Go ku ën a wosu tu.’ Ma Luti piki ën taa: ’Na musu mi u mi go disa i e! Be mi go ku i nöö. Teka joo go, naandë mi o go tu, nöö teka joo libi, naandë mi o libi tu. Dee sëmbë fii o dë sëmbë u mi, nöö di Gadu fii o dë mi Gadu tu. Teka joo dëdë, naandë mi o dëdë, nöö naandë seei de o bei mi tu.’ Di Luti taki dee soni aki te a kaba, hën Naomi disëën, an suku u mbei a toona go a wosu möön.

Te u kaba fëën dee tu mujëë dou Isaëli. Hën de tuwë lai naandë. Wantewante Luti go wooko a goon dendu, biga a di juu dë de bi ta koti wan pei soni kuma alisi. Nöö wan womi de kai Boasi bi mbei a go koti di soni dë nëën goon. I sabi ambë bi dë di mama u Boasi ö? A bi dë Lakabu u di foto Jelikou.

Wan daka hën Boasi piki Luti taa: ’Mi jei hii soni fii. Mi jei fa i libi bunu ku Naomi. Mi sabi taa i go disa i mama ku i tata ku i köndë, u ko libi a woto sëmbë dendu di ja bi sabi wan daka. Be Jehovah libi bunu ku i!’

Hën Luti piki ën taa: ’Tio o, i libi bunu ku mi e. I mbei mi fii möön bunu u di i taki sö suti ku mi.’ Boasi lobi Luti seei, nöö an tei longi ufö de toou. Di soni dë mbei Naomi wai seei! Ma Naomi bi möön wai seei di Luti ku Boasi pali di fosu womi mii u de de kai Obëti. Bakaten Obëti toon avo u Dafiti. Woo lei möön hia soni u Dafiti bakaten.