Di könuköndë paati

I SA’ faandi mbei di womi aki ta tënë di djakiti fëën pisipisi ö? Jehovah wë piki ën faa du sö. Di womi aki da wan tjabukama u Gadu. De ta kai ën Ahija. I sa’ ambë da wan tjabukama u? A dë wan sëmbë di Gadu ta piki a fesi andi o pasa bakaten.

Aki Ahija ta fan ku Jelobiam. Jelobiam da wan womi di Salumon buta a wooko u tei fesi te a kë mbei wosu. Di Ahija miti Jelobiam a di pasi liba aki, hën Ahija du wan apaiti soni. A puu di njunjun djakiti di a bisi, hën a tënëën a 12 pisi. A piki Jelobiam taa: ’Tei 10 pisi fii seei.’ I sa’ faandi mbei Ahija da Jelobiam 10 pisi ö?

Ahija konda dëën taa Jehovah o tei di könuköndë puu a Salumon maun. A piki ën taa Jehovah o da Jelobiam 10 lö. Hën da tu lö nöö o fika da Lahabiam, di womi mii u Salumon, faa tii.

Di Salumon jei di soni Ahija piki Jelobiam, hën Salumon hati ko boonu seei. A biinga u kii Jelobiam. Ma Jelobiam fusi go a Egepiti. Baka wan pisiten, Salumon ko dëdë. A bi dë könu 40 jaa longi, nöö baka di dë di womi mii fëën, Lahabiam, toon könu. A Egepiti Jelobiam dë di a jei taa Salumon dëdë. Fëën mbei a toona ko baka a Isaëli.

Lahabiam an dë wan bumbuu könu. A libi möön hogi ku dee sëmbë möön hën tata Salumon. Jelobiam ku wan tu woto hei sëmbë go a Könu Lahabiam u hakisi ën faa libi möön bunu ku dee sëmbë. Ma Lahabiam an haika de. Te i luku ën bunu, a ko dë möön hogi. Fëën mbei dee sëmbë mbei Jelobiam toon könu u 10 lö, ma dee tu lö Benjamin ku Juda, hoi Lahabiam kuma de könu.

Jelobiam an kë u dee sëmbë fëën go dini a di Wosu u Jehovah a Jelusalen. Fëën mbei a mbei tu piki goutu kau, hën a mbei dee sëmbë u di 10-lö könuköndë dini de. Hesihesi seei hogidu ku hogilibi ko fuu di köndë.

Toobi dë a di tu-lö könuköndë tu. Lahabiam an tii dou feifi jaa seei, hën di könu u Egepiti ko feti ku Jelusalen. A tei sömëni gudu u di Wosu u Gadu tja go. Hën da wan sati pisiten nöö di Wosu u Gadu tan leti kumafa a bi dë di de mbei ën.