Gadu heepi Esikia

I SA’ faandi mbei di womi aki ta begi Jehovah u? Faandi mbei a tja dee biifi dë go buta a fesi u di begi tafa u Jehovah? Di womi dë da Esikia. A dë könu u di tu-lö könuköndë a libasë u Isaëli. Nöö a dë ku gaan fuka seei. Faandi mbei?

U di dee Asilia sodati poi di 10-lö könuköndë a bausë kaa. Jehovah disa di soni dë pasa ku de, u di dee sëmbë dë bi ko hogi poi. Nöö dee Asilia sodati ko u ko feti ku di tu-lö könuköndë.

Djunsu dë di könu u Asilia manda biifi da Könu Esikia. Dee biifi dë wë Esikia buta a Gadu fesi. De ta mbei Jehovah fa a dee biifi, nöö de piki Esikia taa an dë faa feti möön, a lasi di feti kaa. Di soni aki mbei Esikia begi taa: ’Ke Jehovah o, tjubi u da di könu u Asilia e. Nöö hii nasiön o ko sabi taa i wanwan tö da Gadu.’ Jehovah o haika di begi u Esikia u?

Esikia da wan bumbuu könu. An dë kuma dee hogihati könu u di 10-lö könuköndë u Isaëli, nasö kuma di hogihati tata fëën, Könu Akasi. Esikia bi ta da jesi a hii dee wëti u Jehovah. Fëën mbei baka di Esikia kaba begi, di tjabukama Jesaaja manda wan buka u Jehovah dëën taa: ’Di könu u Asilia an o denda a Jelusalen. Na wan u dee sodati fëën seei o ko zuntu u di köndë. De an o suti na wan piiwa ko a di köndë dendu.’

Luku di peentje a di bladsëidë aki. I sa’ un köndë sodati dë a goon dëdëdëdë aki ö? Dee Asilia sodati wë e. Jehovah manda di engel fëën go kii 185.000 sodati u Asilia a wan kodo ndeti dendu. Sö di könu u Asilia ko disa di feti, toona go fëën baka a wosu.

Di tu-lö könuköndë feni tjubi, nöö dee sëmbë böö u wan pisiten. Ma baka di Esikia dëdë, di womi mii fëën Manase toon könu. Manase ku di womi mii fëën Amon, di ko nëën baka bi dë tu hogihati könu seei. Fëën mbei hogilibi ku hogidu bi fuu di köndë baka. Di wan u dee futuboi u Könu Amon kii ën, hën di womi mii fëën, Josia, toon könu u di tu-lö könuköndë.