Moodekai ku Ësitë

BOO taki pikisö andi bi pasa wan tu jaa ufö Ësala go a Jelusalen. Moodekai ku Ësitë da dee möön nëbai Isaëli sëmbë u di könuköndë u Pëlsia. Ësitë da di mujëë könu, nöö hën tata baaa mii Moodekai da di möön makiti sëmbë baka di könu. Boo go luku unfa sö wan soni du ko.

Ësitë mama ku ën tata dëdë di a bi dë piki mii, nöö fëën mbei Moodekai tei ën kiija. Ahasifelusi, di könu u Pëlsia, abi wan könu wosu a di foto Susan, nöö Moodekai da wan u dee futuboi fëën. Wë wan daka, di könu mujëë Vasti an haika di könu. Fëën mbei di könu tei wan woto mujëë u dë könu mujëë. I sa’ un mujëë a tei ö? Awa, di hanse njönku mujëë Ësitë.

I ta si di gaanfasi womi dee sëmbë ta bendi hedi da u? Hën da Haman. A dë wan nëbai womi u Pëlsia. Haman kë taa Moodekai, di i ta si sindosindo naandë, bendi hedi dëën tu. Ma Moodekai an o du di soni dë. An feni ën wan bunu soni u bendi hedi da sö wan takuhati womi. Di soni dë mbei Haman hati boonu seei. Nöö i saandi a du ö?

Haman go mindi soni da dee Isaëli sëmbë. A piki di könu taa: ’Dee sëmbë aki hogi. De an ta hoi dee wëti fii. De musu dëdë.’ Ahasifelusi an sabi taa hën mujëë Ësitë da wan Isaëli sëmbë. Fëën mbei a haika Haman, hën a mbei de buta wan wëti taa wan daka de o kii hii dee Isaëli sëmbë.

Di Moodekai ko jei di wëti, nöö a kusumi seei. A manda wan buka da Ësitë taa: ’I musu fan ku di könu, nöö begi ën be a heepi u.’ Di wëti u Pëlsia an ta da sëmbë pasi u go luku di könu ee an kai i. Ma Ësitë go a di könu söndö a kai ën. Di könu tëndë di goutu pau fëën dëën, nöö di soni dë kë taki taa de an musu kii ën. Hën Ësitë kai di könu ku Haman u de ko a wan gaan njan. Naandë di könu hakisi Ësitë un bunu a kë faa du dëën. Hën Ësitë piki ën taa ee hën ku Haman ko a wan woto njan di debooko fëën, nöö a o konda dëën.

A di njan dë Ësitë piki di könu taa: ’De o kii mi ku dee sëmbë u mi.’ Di könu hati ko boonu. Hën a hakisi taa: ’Ambë peevu u du di soni dë?’

Hën Ësitë piki: ’Di womi aki, hën da di felantima, di takuhati Haman!’

Nöö di könu hati ko boonu seei. A taki taa de musu kii Haman. Baka di dë, di könu mbei Moodekai ko dë di möön makiti sëmbë nëën baka. Nöö Moodekai seeka soni sö taa de mbei wan njunjun wëti di o da dee Isaëli sëmbë pasi u feti da di libi u de a di daka de bi buta u kii de. U di Moodekai dë sö wan nëbai womi, mbei sömëni sëmbë heepi dee Isaëli sëmbë, nöö de puu de a dee felantima u de maun.