Dee peni u Jelusalen

LUKU di wooko de ta du naandë. Dee Isaëli sëmbë ta wooko taanga u mbei dee peni u Jelusalen. Di Könu Nebukatnesali bi booko Jelusalen söwan 152 jaa a fesi, a bi naki dee peni booko, nöö a bi tjuma dee gaandöö u di foto tu. Dee Isaëli sëmbë an bi mbei dee peni wantewante di de kumutu a Babilon.

Unfa i pakisei taa dee sëmbë bi ta fii hii dee jaa de bi libi söndö peni u lontu di köndë tapa? De an bi ta fii bunu. An bi o taanga da dee felantima u de u ko feti ku de. Ma te u kaba fëën di womi Nehemia heepi dee sëmbë u mbei dee peni baka. I sa’ ambë da Nehemia u?

Nehemia da wan Isaëli womi u di foto Susan, ka Moodekai ku Ësitë ta libi. Nehemia bi ta wooko a di könu wosu, nöö a kan taa a bi dë wan bumbuu mati u Moodekai ku di mujëë könu Ësitë. Ma di Bëibel an ta taki taa Nehemia bi ta wooko da Ësitë manu, Könu Ahasifelusi. A bi ta wooko da di könu di ko a di dë baka, Könu Artakserkses.

Na fëëkëtë taa Artakserkses da di bumbuu könu di da Ësala möni u go a Jelusalen go seeka di Wosu u Jehovah. Ma Ësala an bi mbei dee bookobooko peni u di foto. Boo go luku unfa a du ko taa Nehemia du di wooko dë.

Söwan 13 jaa pasa sensi di Artakserkses da Ësala di möni faa seeka di Wosu u Gadu. Nehemia ko dë di hedima u dee sëmbë dee ta kandi diingi da Könu Artakserkses. Hën da a ta kandi win da di könu, nöö a ta luku bunu taa na wan sëmbë buta poozian da di könu u bebe. Wan gaan wooko wë di de e.

Wë wan daka, Nehemia baaa Hanani ku woto womi u di köndë Isaëli go luku Nehemia. De konda dëën un pei fuka dee Isaëli sëmbë abi, ku söseei taa dee peni u Jelusalen dë bookobooko jeti. Fëën mbei Nehemia tjali seei, nöö a begi Jehovah u di soni dë.

Wan daka di könu si taa Nehemia dë ku tjali. Hën a hakisi ën taa: ’Andi mbei fesi fii dë tjalitjali sö?’ Nehemia piki ën taa a ta tjali u di Jelusalen an dë bunu, nöö dee peni dë bookobooko. Hën di könu hakisi ën taa: ’Andi i kë u mi du da i?’

Nehemia piki ën taa: ’Be mi go a Jelusalen sö taa mi sa mbei dee peni baka.’ Könu Artakserkses a’ bunuhati. A piki Nehemia taa a sa go, nöö a heepi ën feni udu u du di wooko. Baka di Nehemia dou a Jelusalen, hën a piki dee sëmbë andi a kë du. Di woto kai ku de, hën de taa: ’Un boo bigi di wooko wantewante.’

Di dee felantima u dee Isaëli sëmbë si fa dee peni ta hei nango nöömö, hën de taki taa: ’Un boo go kii de u tapa di wooko.’ Ma Nehemia ko jei di soni, hën a da dee wookoma ufangi ku lanza. Hën a piki de taa: ’Wan fëëë dee felantima fuunu. Un feti da dee baaa fuunu, dee mii fuunu, dee mujëë fuunu ku dee wosu fuunu.’

Dee sëmbë a’ degihati seei. Ndeti ku didia dee fetilai u de dë seekaseeka, nöö de ta wooko go dou. Fëën mbei de kaba mbei dee peni a 52 daka dendu nöö. Awa ufö dee sëmbë sa dë waiwai a di foto dendu. Nehemia ku Ësala ta lei dee sëmbë dee wëti u Gadu, nöö dee sëmbë dë ku piizii.

Ma tökuseei soni an dë kumafa a bi dë ufö de tja dee Isaëli sëmbë go buta a Babilon kuma saafu. Di könu u Pëlsia hën ta tii dee sëmbë, nöö de musu wooko dëën. Ma Jehovah bi paamusi taa a o manda wan njunjun könu ko di bi o tja böö ko da sëmbë. Ambë da di könu dë? Unfa a o tja böö ko a goonliba? Söwan 450 pasa ufö sëmbë ko sabi möön hia soni u di könu aki. Hën wan mujëë pai wan apaiti mii. Ma woo disa di woto aki da wan woto pasi.