Wan engel go a Malia

DI WAITI mujëë aki da Malia. A dë wan Isaëli mujëë di ta libi a di foto Nazalëti. Gadu sabi taa a dë wan bumbuu mujëë seei. Fëën mbei a manda di engel fëën Gabiëli go fan ku ën. I sabi andi Gabiëli ko piki Malia u? Boo go luku andi a piki ën.

Gabiëli fan ku ën taa: ’Tia, odi oo. I a’ bunuhedi möön hii mujëë e. Jehovah dë ku i.’ Malia an bi si di sëmbë aki wan daka. A panta teee, biga an saandi di engel kë taki. Ma wantewante dë Gabiëli kötö ën hati.

A piki ën taa: ’Na fëëë e Malia. Jehovah feni i bunu seei. Fëën mbei a o du wan gaan foombo soni da i. Abiti möön joo pai wan mii. Nöö i musu kai ën Jesosi.’

Gabiëli ta fan go dou. A taa: ’Di mii di joo pai o hei möön hii sëmbë. Nöö de o kai ën Womi Mii u di Möön Hei Gadu a liba. Nöö Jehovah o butëën ko könu kumafa Dafiti bi dë. Ma Jesosi o dë könu u nöömö, nöö di könuköndë fëën an o kaba möönsö!’

Malia hakisi ën taa: ’Unfa mi sa du dë ku bëë? Ma toou jeti seei. Womi seei më sabi wan daka, nöö unfa mi o pai wan mii?’

Hën Gabiëli piki ën taa: ’Di kaakiti u Gadu hën o ko a i liba. Nöö hën mbei di mii di joo pai, de o kai ën Gaangadu Mii.’ Hën a piki Malia taa: ’Pakisei di sisa fii Elizabëti. Sëmbë bi feni taa a gaandi poi u pai miii. Ma abiti möön a o pai wan womi mii. I si ö, na wan soni dë a goonliba aki di Gadu an sa du.’

Hën Malia piki ën wante taa: ’Mi da Jehovah futuboi. Be a pasa ku mi kumafa i taki dë.’ Hën di de fan sö te de kaba, hën di engel go fëën.

Wantewante Malia go luku Elizabëti. Nöö di Elizabëti jei Malia töngö, hën di mii nëën bëë dendu djombo piizii seei. Di santa jeje u Gadu ko a Elizabëti liba hën a piki Malia taa: ’Keee, mujëë, i a’ bunuhedi möön hii mujëë.’ Malia dë ku Elizabëti söwan dii liba longi, hën a toona go baka nëën köndë Nazalëti.

Malia o toou ku di womi de kai Josëfu. Ma di Josëfu jei taa Malia dë ku bëë, hën an kë toou ku ën möön. Hën wan engel u Gadu ko piki ën taa: ’Ja musu fëëë fii tei Malia fii mujëë buta a i wosu e. Biga Gadu wë hën dëën wan womi mii.’ Sö Malia ku Josëfu ko toou, nöö hën de dë ta wakiti di pai daka u Jesosi.