Di mujëë a di baaku wata

JESOSI sindo böö a wan baaku wata a Samalia. Dee bakama fëën go a foto u go bai njanjan. Di mujëë Jesosi ta fan ku ën dë ko ba wata. A piki ën taa: ’Mujëë o, mi begi i, da mi wan piki wata mi bebe.’

Di soni dë foondo di mujëë seei. I sa’ faandi mbei ö? Wë u di Jesosi da wan Dju, nöö di mujëë da wan Samalia mujëë. Nöö gaansë u dee Dju an lo’ Samalia sëmbë. De an kë ta fan ku de seepiseepi! Ma Jesosi lobi hii pei sëmbë. Fëën mbei a piki taa: ’Wë mujëë, ee i bi sabi di Sëmbë ta hakisi fii dëën wata aki, nöö i bi o bia begi ën faa da i wata fii sa feni libi nëën.’

Nöö hën di mujëë piki ën taa: ’Wë womi di baaku aki fundu poi, nöö na wan buketi seei i abi u kisi wata. Nöö naasë joo feni wata da mi fu mi sa feni libi nëën?’

Nöö hën Jesosi toona taki taa: ’Wë ee i bebe di wata aki sö, nöö dëëwata o kisi i baka. Ma di wata di mi o da i sa mbei wan sëmbë feni di libi u teego.’

Nöö hën di mujëë taki dëën taa: ’Wë womi o, wë da mi di wata dë e baa, fu dëëwata an musu kisi mi möön. Nöö an o dë u mi ta ko aki ta ko ta ba wata hiniwanten möön.’

Di mujëë pakisei taa Jesosi bi ta taki u tuutuu wata. Ma a bi ta taki dee tuutuu woto di nama ku Gadu ku di könuköndë fëën. Dee tuutuu woto dë dë kuma wata di ta da sëmbë libi. De sa mbei wan sëmbë feni teego libi.

Hën Jesosi taki da di mujëë taa: ’Wë antoobi. Go kai i manu be i ku ën ko.’

Hën di mujëë taa: ’Ma a’ manu e!’

Hën Jesosi piki ën taa: ’Söö mujëë, i piki bunu. Ja a’ manu tuu. Biga feifi womi i tei tuwë kaa. Nöö di i ku ën sai naandë fa u dë aki, nöö an dë manu fii tu.’

Di mujëë foondo u di hii dee soni a jei dë, dë sö tuu. Unfa Jesosi du sabi dee soni aki? Wë u di Jesosi da di Sëmbë di Gadu bi paamusi u manda ko, nöö Gadu bi konda di soni dë dëën. A di juu dë hën dee bakama fëën ko dou, hën de foondo u si taa Jesosi ta fan ku wan Samalia mujëë.

Andi u ta lei u di woto aki? A ta lei u taa Jesosi lobi hii pei lö sëmbë. Sö nöö u musu du tu. Wa musu go pakisei taa so sëmbë an bunu u di de dë woto lö sëmbë. Jesosi kë taa hii sëmbë musu ko sabi di tuutuu lei di ta tja sëmbë go a teego libi. Nöö u seei musu kë heepi wotowan u ko sabi di tuu.