A lobi piki mii

LUKU fa Jesosi ta baasa di piki womi mii. I sa taki taa Jesosi ta booko hën hedi seei ku piki mii. Dee womi dee ta luku ën dë da dee apösutu fëën. Andi Jesosi ta piki de? Boo go luku.

Djunsu dë Jesosi ku dee apösutu fëën kumutu a wan longi waka. Di de bi dë a pasi liba dee apösutu bi ta fia ku de seei. Fëën mbei di de ko dou, hën Jesosi hakisi de taa: ’Fa u bi dë a pasi ta ko dë, andi un bi feni ta fia ku unu seei sö?’ Jesosi bi sabi fu andi de bi ta fia ku de seei. Ma a hakisi di soni dë u si ee dee apösutu bi o konda dëën.

Dee apösutu an piki, biga di de bi dë a pasi liba de bi ta fia ee undi u de hei möön dee woto. So u dee apösutu bi kë dë hei möön dee wotowan. Unfa Jesosi o konda da de taa an bunu te wan sëmbë kë dë hei möön wotowan?

A kai di piki womi mii dë ko buta a hii de tuu fesi. Hën a piki dee bakama fëën taa: ’Mi kë fuun sabi di soni aki taa, ee wan sëmbë ja bia ko abi di fasi di wan piki mii abi, nöö ja o sa dë a di könuköndë u Gadu dendu möönsö e. Di möön hei sëmbë a di könuköndë o dë di wan di o ko dë kuma di piki mii aki.’ I sabi faandi mbei Jesosi taki di soni aki ö?

Wë, u di piki mii an ta biinga u dë di möön hei wan nasö di möön gaan wan u wotowan. Fëën mbei dee apösutu musu lei u dë kuma piki mii, ma de an musu biinga u dë di möön hei wan nasö di möön gaan wan.

Jesosi bi lei kaa taa a ta booko hën hedi ku piki mii. Wan tu liba baka di dë wanlö sëmbë tja dee mii u de u ko luku Jesosi. Dee apösutu bi kë tapa de. Ma Jesosi piki dee apösutu fëën taa: ’Un disa dee mii be de ko a mi, wan tapa de e. Biga dee sëmbë dee dë kuma dee piki mii i si aki, nöö de o dë a di könuköndë u Gadu.’ Nöö di a fan sö te a kaba, hën a tei dee mii nëën maun, hën a begi Gadu da de. An bunu u ko sabi taa Jesosi lobi piki mii ö?