De dë a wan kamba a liba

TU DAKA pasa, a dë gaansaba ndeti. Jesosi ku dee 12 apösutu fëën ko a di gaan kamba aki u njan di Pasika. Di womi di i si ta waka nango dë da Judasi Isikaliotu. A nango piki dee begima unfa de sa feni Jesosi kisi.

Di daka a fesi, Judasi bi go hakisi de wan pasi kaa: ’Andi woon paka mi ee mi heepi unu fuun sa feni Jesosi kisi?’ De piki ën taa: ’Diiteni pisi soofu möni.’ Hën wë mbei Judasi ta waka nango u go miti dee womi aki sö taa a sa tja de go a Jesosi. Na wan gaan hogi a ta du ö?

De kaba njan di Pasika. Ma Jesosi ta seti wan woto apaiti njanjan. A tëndë wan pisi bëëë da dee apösutu fëën, hën a taa: ’Un njan mën, biga disi da di sinkii u mi di mi o da fuunu hedi.’ Hën a tëndë wan kan win da de, hën a taa: ’Un tei nöö un bebe, biga disi da di buuu u mi di mi o tuwë a goon fuunu hedi.’ Di Bëibel ta kai di daka aki di ’Ndeti njanjan u Masa’.

Dee Isaëli sëmbë bi ta njan di Pasika u mëni di ten di wan engel u Gadu bi pasa dee wosu u de a Egepiti. Di engel an bi du soni ku dee mii u de, ma a bi kii hii dee fosu pai mii a dee wosu u dee Egepiti sëmbë. Ma Jesosi kë dee bakama fëën mëni wan woto soni nöunöu. A kë u de mëni fa a o da di libi fëën da de. Fëën mbei a piki de o de hoi di apaiti njanjan aki hiniwan jaa.

Baka di de njan di Ndeti Njanjan u Masa, hën Jesosi piki dee apösutu fëën u tai hati hoi taanga a di biibi u de. Te u kaba fëën, hën de kanda da Gadu, hën de hopo go kumutu naandë. Ndeti bi tapa kaa, kandë gaan ndeti bi pasa. Wë boo go luku naasë de go.