De naki Sitefani ku sitonu kii

DI WOMI di tjökö kini a goon dë da Sitefani. A dë wan bumbuu bakama u Jesosi. Ma luku andi ta pasa ku ën! Dee womi aki ta naki ën ku sitonu. Faandi mbei de buuse Sitefani gaanfa sö taa de ta du di gaan hogi aki ku ën? Boo go luku.

Gadu bi heepi Sitefani, nöö a bi ta du gaan foombo soni. Dee womi aki an lobi sö. Fëën mbei de bigi buja ku ën taa an ta lei sëmbë tuutuu soni u Gadu. Ma Gadu da Sitefani gaan köni, nöö Sitefani ta taki gbelin taa dee womi aki an ta lei sëmbë bumbuu soni. Di soni dë mbei hati u de boonu möön gaanfa seei. Fëën mbei de kisi ën, hën de tei sëmbë ko ta mindi soni dëën.

Dee Kaba Hei Begima hakisi Sitefani taa: ’Womi dee soni dee sëmbë taki fii dë, tuu nö?’ Sitefani piki de u di a konda Bëibel woto da de. A kaba u di woto, a konda da de unfa hogihatima bi buuse dee tjabukama u Jehovah a fesiten. Hën a piki de taa: ’Un dë leti kuma dee hogihatima dë. Un kii Jesosi di futuboi u Gadu, nöö wan hoi dee wëti u Gadu.’

Di soni aki mbei dee hedima u keiki hati boonu te na soni! De ta njan tanda guwaguwa seei. Ma Sitefani hopo wojo luku liba, hën a taa: ’Luku, mi si Jesosi taanputaanpu a di letimaun së u Gadu a liba.’ Hën de tapa de jesi ku de maun, hën de tuu kule go a Sitefani. De kisi ën hën de hai ën gulululu tja go a döösë u di köndë.

Hën de puu koosu a de sinkii disa da di njönku kijoo Saulosu u hoi da de. I ta si Saulosu ö? Hën so u de bigi naki Sitefani ku sitonu. Sitefani tjökö kini a goon kumafa i ta si, hën a begi Gadu taa: ’Jehovah na sitaafu de u di gaan hogi de ta du aki e.’ A bi sabi taa dee hedima u keiki bi ganjan so u de. Baka di dë, hën Sitefani dëdë.

Andi i ta du te wan sëmbë du wan hogi soni ku i? I ta pooba u du ën hogi baka u, nasö i ta hakisi Gadu u du ën hogi ö? Na sö Sitefani ku Jesosi bi du. De bi ta libi bunu ku hii sëmbë, söseei dee wan di an bi ta libi bunu ku de. Boo mbei möiti u waka a de baka.