Timoteo ta heepi Paulosu

DI NJÖNKU kijoo i ta si ku apösutu Paulosu aki da Timoteo. Timoteo ta libi ku dee sëmbë fëën a Lisita. Hën mama në da Eunisi, nöö hën avo në da Loisi.

Disi da di u dii pasi di Paulosu dë a Lisita. Boo taa wan jaa a fesi Paulosu ku Banabasi bi ko naandë di fosu pasi di de bi dë a wan pleiki waka u de. Nöö Paulosu toona go naandë baka ku hën mati Silasi.

I saandi Paulosu ta taki da Timoteo u? A ta hakisi ën taa: ’Ja kë ko ku mi ku Silasi ö? I sa dë wan heepi da u fuu pleiki da sëmbë dee ta libi a longi kamian.’

Hën Timoteo piki taa: ’Aai, mi kë go ku unu.’ Baka di dë hën Timoteo go disa dee sëmbë fëën, hën a go ku Paulosu ku Silasi. Ma ufö u lei woto soni u di waka u de, boo go luku andi bi pasa ku Paulosu. Söwan 17 jaa pasa sensi di Jesosi bi ko a Paulosu di a bi dë a pasi nango a Damasikusi.

Mëni jeti taa Paulosu bi go a Damasikusi u sitaafu dee bakama u Jesosi, ma nöunöu hënseei ko dë wan bakama! Bakaten wan tu felantima seeka u kii Paulosu u di de an lobi dee soni a ta lei u Jesosi. Ma dee bakama heepi Paulosu u fusi go. De butëën a wan manda dendu, hën de sakëën a di peni u di köndë be a go.

Baka di dë Paulosu go na Antiokia u go pleiki. Naandë de kai dee bakama u Jesosi, Keesitu sëmbë u di fosu pasi. De puu Paulosu ku Banabasi u Antiokia manda go a wan pleiki waka a longi köndë. Wan u dee köndë ka de dou da Lisita, ka Timoteo ta libi.

Boo taa wan jaa a baka, Paulosu toona ko baka a Lisita di a dë a di u tu pleiki waka. Di Timoteo go ku Paulosu ku Silasi, nöö i sa’ naasë de go u? Luku di kaita, nöö boo taki u wan tu u dee kamian.

De go fosu a wan zuntu köndë de kai Ikonium, hën de go a di u tu köndë de kai Antiokia. Baka di dë de waka dou a Toasi, hën de go a Filipi, Tesalonika ku Belia. I ta si Atene a di kaita u? Paulosu pleiki naandë tu. Nöö hën de go tan wan jaa ku hafu ta pleiki a Kolenti. Te u kaba fëën, de tan kölö sö a Efeise. Hën de tei boto toona go baka a Sesalia, nöö de waka go na Antiokia, ka Paulosu ta libi.

Sö wë Timoteo waka höndöhöndö kilomëti ta heepi Paulosu paaja di bunu buka, nöö de hopo sömëni kemeente u Keesitu sëmbë. Te i ko möön bigi, joo dë wan tuutuu futuboi u Gadu kuma Timoteo u?