Di u tu woto

Ambë da Gadu

Ambë da di tuutuu Gadu, unfa da hën në. (1, 2)

Un sootu pei sinkii a abi. (3)

Andi da dee apaiti fasi di a abi. (4)

U musu mbei pindi te u ta begi hën nö? (5)

Andi da dee tu fasi fa u sa ko sabi Gadu. (6)

1. Libisëmbë ta dini peipei soni. Ma di Bëibel ta konda da u taa wan kodo tuutuu Gadu tö nöö dë. Hën mbei hii dee soni a hemel ku goonliba. Fu di hën da u libi, mbei hën wanwan tö u musu dini.​—1 Kolente 8:5, 6; Akoalimbo 4:11.

2. Hia fasi dë fa i sa kai Gadu, ma wan kodo në tö nöö a abi. Di në dë da JEHOVAH. A wanlo u dee Bëibel, de puu di në u Gadu buta woto fasi kuma, Masa nasö Gadu. Ma di ten di de bi sikifi Bëibel, nöö di në Jehovah, bi dë abiti möön sëbën dusun toon [7000], nëën dendu.​—Exodus 3:15; Psalm 83:18.

3. Jehovah abi wan sinkii, ma an dë kuma di fuu. „Gadu dë wan jeje” sö di Bëibel ta konda (Johanisi 4:24). Wan jeje da wan libi di hei möön di fu libisëmbë. Na wan sëmbë si Gadu jeti. Jehovah ta libi a hemel, ma a sa si hii soni (Psalm 11:4, 5; Johanisi 1:18). Ma andi da di santa jeje seei? An dë wan sëmbë kuma Gadu. A dë di kaakiti fëën ku andi a ta wooko.​—Psalm 104:30.

4. Di Bëibel ta lei u dee fasi di Gadu abi. A ta lei u taa dee tumusi apaiti fasi fëën da lobi, letidu, köni ku makiti (Deuteronomium 32:4; Job 12:13; Jesaja 40:26; 1 Johanisi 4:8). Di Bëibel ta konda da u taa a abi tjali hati ku sëmbë tu, a lobi sëmbë, a ta da sëmbë paadon, a lobi u da sëmbë soni ku a abi pasensi. Nöö u kuma mii di ta du andi a ta taki, musu mbei möiti u ko abi dee fasi aki tu.​—Efeise 5:1, 2.

5. U musu bendi hedi ta begi da wan pindi ö? U sa begi wan footoo nasö wan peentje te u ta dini Gadu ö? Nönö ee! (Exodus 20:4, 5) Jehovah taki taa hën wanwan tö nöö u musu dini. Di gaandi fëën di a abi, an ta paati hën ku na wan sëmbë nasö wan soni. Dee pindi di sëmbë ta dini, an abi na wan hojo makiti u sa heepi u.​—Psalm 115:4–8; Jesaja 42:8.

6. Unfa u sa ko sabi Gadu möön bunu. Wan fasi da te u ta luku dee soni di a mbei finifini. Nöö u musu pakisei bunu u dee soni dë u ko fusutan andi de ta lei u. Dee soni di Gadu mbei ta lei u taa di makiti ku di köni fëën bigi gaanfa. U ta si di lobi fëën a hii dee soni di a mbei (Psalm 19:1-6; Loome 1:20). Wan woto fasi fa u sa ko sabi Gadu möön bunu da te u ta tei lei u di Bëibel. A di Bëibel a ta konda da u möön bunu un pei Gadu a dë. A ta konda da u andi a o du, sö seei dee soni di a kë taa u musu du tu.​—Amos 3:7; 2 Timoteo 3:16, 17.

[Peentje a bladsëidë 5]

U ta ko sabi Gadu möön bunu te u ta luku dee soni di a mbei ku te u ta tei lei u di Bëibel