Di u dii woto
Ambë da Jesosi Keesitu
Andi mbei Bëibel ta kai Jesosi di fosu womi mii u Gadu. (1)
Andi mbei di Bëibel ta kai hën di „Wöutu”. (1)
Faandi mbei Jesosi ko kuma wan libisëmbë a goonliba. (2-4)
Andi mbei a bi ta du foombo soni. (5)
Andi Jesosi o du a di ten di dë zuntu a u fesi ta ko. (6)
1. Jesosi bi ta libi a hemel kuma wan jeje bifö a bi ko a goonliba aki. Hën bi dë di fosu soni di Gadu mbei. Fëën mbei Bëibel ta kai hën di fosu womi mii u Gadu (Kolosën 1:15; Akoalimbo 3:14). Jesosi wanwan tö Gadu bi mbei hën seei. Bifö Jesosi bi toon libi sëmbë a bi heepi Gadu u mbei hii dee woto soni di de a hemel ku goonliba, kuma wan sëmbë di sabi hën wooko bunu (Prediker 8:22-31; Kolosën 1:16, 17). A bi heepi Gadu kuma wan sëmbë di ta bai basia dëën. Fëën mbei de ta kai Jesosi di „Wöutu”.—Johanisi 1:1-3; Akoalimbo 19:13.
2. Gadu manda di womi mii fëën ko a goonliba aki, fu di a bi puu di libi fëën ala buta go a di bëë dendu u Malia. Fëën mbei Jesosi an bi abi wan libisëmbë tata. Di soni aki mbei taa Jesosi an bi abi na wan zöndu kuma libisëmbë. Gadu manda Jesosi ko a goonliba u dii soni hedi. (1) U lei libisëmbë dee tuutuu woto u Gadu (Johanisi 18:37). (2) U dini Gadu a wan bunu fasi söndö föutu, fu woto sëmbë sa waka nëë baka te de kë dini Gadu tu (1 Petuisi 2:21). Nöö di u (3) fu dëdë da libisëmbë u de sa ko fii fu zöndu ku dëdë. Andi mbei di soni aki bi dë fanöudu.—Mateosi 20:28.
3. Fu di di fosu womi, Adam, bi pasa Gadu buka, mbei a bi du wan soni di Bëibel ta kai „zöndu.” Fëën mbei Gadu piki hën taa a o dëdë (Genesis 3:17-19). Di soni aki bi mbei taa an bi dë telutelu möön fu di an bi dou dee maiki u Gadu möön. Sapisapi a bi ko gaandi, te u kaba hën a dëdë. Di zöndu u Adam bi kisi dee mii fëën palalaa te dou. Di soni aki mbei u seei ko ta gaandi, ta siki, ta dëdë. Un fa libisëmbë sa ko fii u dee soni aki.—Loomë 3:23; 5:12.
4. Jesosi bi dë wan telutelu sëmbë kumafa Adam bi dë. Ma Jesosi bi dë woto fasi, a bi ta haika Gadu hii juu, wansi soni bi ta taanga dëën seei. Fëën mbei a bi sa paka da di zöndu u Adam ku di telutelu libi fëën. Di soni aki di Bëibel ta kai ’wan paiman di paka u puu u’ a zöndu basu nasö lusupaima. Dee bakamii u Adam o ko fii u di dëdë sitaafu Adam bi tjako a de liba. Hii sëmbë di ta biibi a Jesosi, sa kisi paadon u dee zöndu u de, ku libi u teego.—1 Timoteo 2:5, 6; Johanisi 3:16; Loomë 5:18, 19.
5. Di Jesosi bi dë a goonliba aki, a bi ta kula siki sëmbë, a bi ta da sëmbë di hangi bi ta kii njanjan sö seei a bi ta tapa gaan ventu. A bi ta weki dëdë sëmbë tu. Faandi mbei Jesosi bi ta du dee foombo soni aki? (1) A bi ta tjali da sëmbë di bi ta pena, fëën mbei a bi kë heepi de. (2) Dee foombo soni aki bi ta mbei sëmbë ko si taa hën da di womi mii u Gadu. (3) De bi lei u andi a o du da dee libisëmbë di ta haika hën kuëën tata te a o tii kuma könu a hii di goonliba.—Mateosi 14:14; Maikusi 2:10-12; Johanisi 5:28, 29.
6. Di Jesosi bi dëdë Gadu bi weki hën baka ko kuma wan jeje, nöö hën a bi toona go baka a hemel (1 Petuisi 3:18). Sensi di ten dë Gadu bi butëën ko Könu. An o tei longi möön, nöö Jesosi o puu hii hogi ku penalibi a goonliba aki.—Psalm 37:9-11; Spreuken 2:21, 22.
[Peentje a bladsëidë 7]
Dee soni di Jesosi bi ta du di a bi dë a goonliba aki bi dë: di lei di a bi ta lei sëmbë u Gadu, di du di a bi ta du foombo soni ku di dëdë di a dëdë da u seei