Di u fö woto
Ambë da Didibi
Satan Didibi, un së a kumutu? (1, 2)
Un fa Satan ta ganja sëmbë tjika? (3-7)
Faandi mbei i musu tötö futu taanga da Didibi? (7)
1. Di wöutu „didibi” kë taki wan sëmbë di ta mindi soni a wan hogihati fasi da wan woto sëmbë. „Satan” kë taki wan felantima nasö wan djënsima. Dee në aki di möön gaan felantima u Gadu abi. A di bigin, a bi dë wan engel di bi abi telutelu libi a hemel, ka a bi ta libi a Gadu ala. Ma baka wan pisiten a bi ko pakisei tumusi bigi fëën seei, a bi kë taa hën libisëmbë musu dini, ma na Gadu di bi mbei de.—Mateosi 4:8-10.
2. Di engel aki, di de ta kai Satan, bi wooko ku wan sindeki u fan ku Eva. Fu di a bi konda soni da Eva di an bi dë tuu, mbei a bi mbei a taanga jesi Gadu. Ku di soni di Satan bi du aki, a söi taa Gadu an abi leti u tii libisëmbë. Satan taki taa Gadu an abi bunu u dee sëmbë di a ta tii a pakisei. Sö seei Satan taki taa na wan sëmbë seei bi o dë di bi o tan dini Gadu, te soni ta miti hën. Fu di a du dee soni aki, mbei Satan mbei hën seei ko toon wan felantima u Gadu. U di soni aki mbei de ta kai hën, Satan Didibi.—Genesis 3:1-5; Job 1:8-11; Akoalimbo 12:9.
3. Satan ta mbei möiti u ganja sëmbë u de sa dini hën (2 Kolente 11:3, 14). Wan u dee fasi fa a ta wooko u ganja sëmbë da falisi keiki. Ee wan keiki dë di ta lei sëmbë soni u Gadu di an dë tuu, nöö di keiki dë abi dee pakisei u Satan (Johanisi 8:44). Kande dee sëmbë di dë a dee lö pei keiki dë ta biibi taa de ta dini di tuutuu Gadu, ma hii di dë Satan de ta dini. Hën da ’di gadu u di goonliba aki’.—2 Kolente 4:4.
4. Bonu wooko da wan woto fasi fa Satan ta kisi sëmbë buta nëën basu. De ta kai taku jeje u tjubi de, u du woto sëmbë hogi, u taki soni da de di musu pasa jeti nasö fu du foombo soni da de. Satan da di sëmbë di ta du hii dee hogi soni aki. Ee u kë taa Gadu feni di fasi fa u ta dini hën bunu, nöö wa musu du na wan hojo soni u bonu wooko.—Deuteronomium 18:10-12; Tjabukama 19:18, 19.
5. Satan ta ganja sëmbë tu fu di a ta mbei de ta fëni taa di lö nasö di famii u de, bunu möön dee wotowan. Sö seei a ta ganja sëmbë fu di a ta mbei de ta dini pölitiki paatëi. So sëmbë ta fii taa di lö nasö di pei sëmbë di de dë möön bunu möön wotowan. Ma di soni aki an dë tuu ee (Tjabukama 10:34, 35). Jaabi sëmbë di ta biibi taa dee pölitiki paatëi o puu dee booko hedi di libisëmbë abi. Wë, ku di fasi fa de ta du dë, de ta söi taa dee an kë di Könuköndë tii u Gadu. Ma di Könuköndë tii u Gadu wawan tö, sa puu dee booko hedi di libisëmbë abi.—Daniël 2:44.
6. Wan woto fasi fa Satan ta ganja sëmbë, da di pooba di a ta pooba sëmbë ku dee zöndu fii di de seei abi. Jehovah ta taki da u taa u musu koti pasi da soni di sa mbei u du zöndu, fu di a sabi taa dee soni dë an o tja bunu da u (Galasia 6:7, 8). So sëmbë o kë taa i musu taanpu ku de a soni di sa mbei i du zöndu. Ma na fëëkëtë taa Satan da di sëmbë di kë taa i musu du dee soni dë.—1 Kolenti 6:9, 10; 15:33.
7. Satan sa mbei sëmbë pena i nasö tapa i a hii fasi fu na dini Jehovah möön. So u dee sëmbë di i lobi seei hati o ko boonu taanga ku i, fu di i ta tei lei u di Bëibel. Joo abi woto sëmbë di o lafu i. Ma ambë da di sëmbë di da i libi? Satan kë mbei i ko fëëë fii sa tapa ku di lei di i ta tei u ko sabi Jehovah. Ma ja musu mbei Satan wini i ee! (Mateosi 10:34-39; 1 Petuisi 5:8, 9) Te i ta finga gingin, tötö futu taanga da Satan, nöö i sa mbei Jehovah pizii fu di i ta söi taa hën abi di leti u tii libisëmbë. —Spreuken 27:11.
[Peentje a bladsëidë 9]
Satan ta ganja sëmbë ku falisi keiki, bonu wooko ku di lobi di wan sëmbë ta lobi hën köndë pasa maaka
[Peentje a bladsëidë 9]
Finga, tötö futu taanga da Satan fu di joo go dou ku di lei di i ta tei u ko sabi Jehovah möön bunu