Di u sikisi woto

Andi da di Könuköndë u Gadu

Naansë di Könuköndë u Gadu dë. (1)

Ambë da di Könu fëën. (2)

Woto sëmbë ta tii a makandi ku di Könu tu ö? Ee a dë sö, nöö u mëni dee sëmbë dë. (3)

Andi da dee soni di u ta si, mbei u sabi taa u ta libi a di kabapisi u di goonliba. (4)

Andi di Könuköndë u Gadu o du da libisëmbë a di ten di dë a u fesi ta ko. (5-7)

1. Di Jesosi bi dë a goonliba aki, a bi lei dee bakama fëën taa de bi musu begi u di Könuköndë u Gadu. Wan könuköndë da wan tii di abi wan könu kuma hedima. Di Könuköndë u Gadu dë wan apaiti tii. A seti a hemelköndë fu sa tii di goonliba aki. A sa mbei di në u Gadu ko santa. A sa mbei dee soni di Gadu kë, pasa a goonliba aki kumafa a ta pasa a hemelköndë ala.​—Mateosi 6:9, 10.

2. Gadu bi paamusi taa Jesosi bi o toon Könu fu di Könuköndë fëën (Lukasi 1:30-33). Di Jesosi bi dë a goonliba aki, a bi söi taa a bi o dë wan tiima di lobi sëmbë, a bi o lobi letilibi tu. Sö seei a bi söi taa a bi o dë wan tiima di dë telutelu. Di a bi toona go baka a hemelköndë, Gadu an bi butëën u sidon kuma Könu u di Könuköndë fëën wantewante sö (Hebelejën 10:12, 13). Ma a di jaa 1914, Jehovah bi da Jesosi di makiti di a bi paamusi hën. Sensi a di ten dë, Jesosi bi ta tii a hemelköndë kuma Könu di Jehovah seei bi buta a wooko.​—Daniël 7:13, 14.

3. Jehovah tei sëmbë sö seei a goonliba aki, womi ku mujëë di abi biibi, u go a hemelköndë. Makandi ku Jesosi de o tii libisëmbë kuma könu, kuutuma nasö priester (Lukasi 22:28-30; Akoalimbo 5:9, 10). Jesosi bi taki taa dee sëmbë di o tii kuëën a makandi bi o „de biti” nasö wan piki hipi. Di piki hipi aki ta konda 144.000 sëmbë.​—Lukasi 12:32; Akoalimbo 14:1-3.

4. Wantewante sö di Jesosi toon Könu a hemelköndë, a bi puu Satan ku dee taku hati engel fëën, tuwë ko a di pisi kamian u goonliba aki. Fëën mbei sensi di jaa 1914, soni ko hogi sö a goonliba aki (Akoalimbo 12:9, 12). Ölöku, hangiten, taku siki di data an sa kula, sëmbë di ta libi söndö wëti, ko möön hia. Hii dee soni aki dë pisi u wan „maaka” di ta söi taa Jesosi ta tii kuma Könu. Ma a ta söi u tu taa u ta libi a di kabapisi u di fasi fa soni seti a goonliba aki.​—Mateosi 24:3, 7, 8, 12; Lukasi 21:10, 11; 2 Timoteo 3:1-5.

5. Abiti möön nöö Jesosi o kuutu libisëmbë fu di a sa paati de kumafa wan sëmbe di ta kiija sikapu ta paati dee sikapu u dee kaabita. Dee „sikapu” da dee sëmbë di söi taa hii juu, awansi andi ta pasa, de ta saka dee seei a di tii fëën basu. De o kisi libi fu teego a goonliba aki. Dee „kaabita” da dee sëmbë di an kë di tii u Gadu (Mateosi 25:31-34, 46). A biti möön, Jesosi sa kii hii dee sëmbë puu, di dë kuma kaabita (2 Tesalonika 1:6-9). Ee i kë dë wan u dee „sikapu” u Jesosi nöö i musu ta haika di bosikopu u di Könuköndë u Gadu. Sö seei i musu ta du dee soni di i ta lei.​—Mateosi 24:14.

6. Nöunöu aki, di goonliba paati a wanlö köndë. Hiniwan u de abi de tii. Dee sëmbë u dee köndë aki, so toon ta feti ku de seei. Ma di Könuköndë u Gadu o puu hii tii u libisëmbë a pasi. Hën wanwan tö sa dë u tii hii di goonliba (Daniël 2:44). Nöö ölöku, kii, fufuu ku hogidu an o dë möön.​—Mika 4:3, 4.

7. Dee sëmbë dee söi taa de tan a di së u Gadu o ko toon telutelu sëmbë a di dusun jaa tii u Jesosi. Sö seei hii di goonliba o ko toon wan paladëisi. A di kaba u di dusun jaa tii, Jesosi sa du hii dee soni di Gadu bi hakisi hën faa du. Nöö a o da di Könuköndë baka nëën Tata (1 Kolenti 15:24). Faandi mbei ja ta konda da dee mati fii ku dee sëmbë di i lobi, andi di Könuköndë u Gadu o du da libisëmbë?

[Peentje a bladsëidë 13]

Te Jesosi o tii, nöö ja o abi sëmbë di an kë si wotowan a wojo möön. Sö seei sëmbë an o kuutu woto wan a fesi möön, sösö u di a dë u wan woto lö hedi