Di u aiti woto

Wosudendu libi di Gadu ta feni bunu

Andi da di gaandi u di womi a di wosudendu fëën. (1)

Unfa wan womi musu libi ku di mujëë fëën. (2)

Andi da dee faantiwöutu di wan tata abi. (3)

Andi da di wooko u di mujëë a di wosudendu fëën. (4)

Andi Gadu kë taa tata, mama ku mii musu du. (5)

Andi di Bëibel ta taki u te wan womi kuëën mujëë paati nasö booko tööu. (6, 7)

1. Di Bëibel taki taa di womi da di hedima u di wosudendu fëën (1 Kolente 11:3). Wan kodo mujëë tö wan womi musu abi. Nöö de musu tööu kumafa a fiti a di wëti u lanti.​—1 Timoteo 3:2; Titusi 3:1.

2. Wan womi musu lobi hën mujëë kumafa a lobi hën seei tu. A musu libi kuëën kumafa Jesosi libi ku dee bakama fëën (Efeise 5:25, 28, 29). Kwetikweti, an musu fon di mujëë fëën nöiti, nasö libi kuëën a wan fasi di na fiti! A möön bunu taa a ta gafëën ku ta a abi lesipeki dëën.​—Kolosën 3:19; 1 Petuisi 3:7.

3. Wan tata musu wooko taanga u sa sölugu hën wosudendu. A musu sölugu taa hën mujëë ku mii abi njanjan, koosu ku wan wosu u tan. Ma a di woto së, wan tata musu lei hën wosudendu soni u Bëibel (1 Timoteo 5:8). A ta tei fesi u heepi di wosudendu fëën u ko sabi Gadu ku dee soni di a o du.​—Deuteronomium 6:4-9; Efeise 6:4.

4. Di mujëë musu dë wan sëmbë di ta heepi hën manu a wan bunu fasi (Genesis 2:18). A musu heepi hën manu u kija dee mii bunu (Spreuken 1:8). Jehovah kë taa di mujëë musu sölugu di wosudendu fëën ku lobi (Spreuken 31:10, 15, 26, 27; Titusi 2:4, 5). A musu abi gaan lesipeki da hën manu.​—Efeise 5:22, 23, 33.

5. Gadu kë taa mii musu ta haika a de tata ku de mama (Efeise 6:1-3). Gadu kë taa tata ku mama musu kiija dee mii u de a wan bunu fasi. Sö seei de musu fan ku de, te de du wan soni di an bunu. Tata ku mama musu sölugu taa de abi ten da dee mii u de. De musu da de lei u di Bëibel. Sö seei de musu ta hoi dee fii u dee mii a pakisei. (Deuteronomium 11:8, 19; Spreuken 22:6, 15). Kwetikweti, nöiti tata ku mama musu fon dee mii u de a wan hogi hati fasi u mbei de kisi mankei.​—Kolosën 3:21.

6. Te wan womi kuëën tööu mujëë kisi toobi, de musu mbei möiti u du dee soni di Bëibel ta taki. Di Bëibel ta lei u taa u musu lobi sëmbë, sö seei u musu da paadon tu (Kolosën 3:12-14). Di Wöutu u Gadu an ta da mujëë ku manu, degi hati u paati u pikipiki soni hedi. Ma wan mujëë sa go disëën manu ee (1) Fu esipeesi di womi an kë sölugu hën wosudendu, (2) di womi abi hogi hati a sö wan fasi taa a sa kii di mujëë nasö dëën mankei, (3) a ta djënsi di mujëë a sö wan fasi taa an sa dini Jehovah.​—1 Kolente 7:12, 13.

7. Te tu sëmbë tööu, nöö de musu libi bunu ku de seei. U go kandi ku wan woto womi nasö go kandi ku wan woto mujëë dë wan zöndu a Jehovah. Ma a dë wan zöndu a di sëmbë di i kuëën tööu tu (Hebelejën 13:4). Te i bi sa kandi ku wan sëmbë di an dë i manu nasö i mujëë, nöö u di soni aki wanwan tö, Bëibel ta da sëmbë pasi u booko tööu u sa tööu baka ku wan woto sëmbë (Mateo 19:6-9; Loome 7:2, 3). Jehovah an kë, taa sëmbë ta booko tööu go tööu ku wan woto sëmbë söndö taa Bëibel da pasi u du sö.​—Maleachi 2:14-16.

[Peentje a bladsëidë 17]

Gadu kë taa tata ku mama musu kiija dee mii u de. Sö seei de musu fan ku de te de du wan soni di an bunu

[Peentje a bladsëidë 17]

Wan tata di lobi hën wosudendu ta sölugu da dee soni di de abi fanöudu, soseei a ta lei de soni u Bëibel