Di u nëigi woto

Sëmbë di ta dini Gadu musu dë limbolimbo

Andi mbei u musu dë limbolimbo a hii fasi. (1)

Andi a kë taki taa wan sëmbë dë limbolimbo te a ta dini Gadu? (2) A di fasi fa a ta tja hën seei (3) në fusutan (4) kuëën sinkii. (5)

Un lö pei fan di na bunu wa kë fan kwetikweti. (6)

1. Jehovah dë wan limbo ku santa Gadu. A kë taa dee sëmbë di ta dini hën musu tan limbolimbo a di fasi fa de ta dini hën, a di fasi fa de ta tja de seei, a di fusutan u de ku de sinkii (1 Petuisi 1:16). U musu mbei taanga möiti u tan limbolimbo a Gadu wojo. U ta libi a wan goonliba di an dë limbolimbo. Sö seei u musu feti ku dee taku fii fuu fu wa o go du soni di an bunu. Ma wa musu tapa u feti di feti dë.

2. A di fasi fa i ta dini Gadu: Ee u kë dini Jehovah, nöö wa sa tan hoi u seei a na wan u dee lei nasö guwenti u keiki di Gadu an feni bunu (falisi keiki). U musu go kumutu a dee lö keiki dë. Sö seei u musu tapa u hoi baka da dee lö keiki dë a hii fasi (2 Kolente 6:14-18; Akoalimbo 18:4). Te u ko lei sabi dee tuutuu woto u Gadu, nöö u musu luku bunu taa sëmbë di ta lei soni di an dë tuu, an ganja u.​—2 Johanisi 10, 11.

3. A di fasi fa i ta tja i seei: Jehovah kë taa dee sëmbë di ta dini hën, musu tja de seei hii juu kuma wan tuutuu bakama u Jesosi (1 Petuisi 2:12). A ta si hii dee soni di u ta du. Dee soni di u ta du tjubutjubi seei a ta si (Hebelejën 4:13). Wa o du dee soni kuma jajolibi nasö woto soni di Gadu an lobi, ma di sëmbë ta du a di ten aki.​—1 Kolente 6:9-11.

4. A i fusutan: Ee u ta fuu u fusutan ku soni di dë limbolimbo, nöö woo tja u seei a wan bunu fasi (Filipi 4:8). Ma ee u ta tan pakisei soni di an bunu, nöö di bakapisi o dë taa woo du soni di dë hogi poi (Mateosi 15:18-20). Wa o du soni kuma: mbei piizii di sa mbei u fusutan ko sundju, haika poku di an bunu nasö luku fëlon di an bunu. U sa fuu di fusutan fuu ku bumbuu pakisei te u ta tei lei u di Wöutu u Gadu.

5. A i sinkii: Fu di de ta wooko da Gadu, dee tuutuu bakama u Jesosi o sölugu taa de sinkii ku koosu dë limbolimbo. Te u kumutu a kakapau, u musu wasi u maun. Sö seei u musu wasi u maun bifö u go njan nasö bifö u panjan njanjan soni. Ee wan bunu kamian an dë ka kakapau [wc] dë fii go, nöö a bi sa dë wan bunu soni fu diki wan baaku u bei di kaka fii (Deuteronomium 23:12, 13). Ee i sinkii dë limbolimbo a sa heepi i fii dë gösöntu. Di wosu u wan bakama u Jesosi musu dë sö seei limbolimbo gbelengbelen, a döösë u di wosu ku dendu fëën. A musu dë wan wosu di ta söi fa wan wosu musu dë tuutuu.

6. Fan di bunu: Dee sëmbë di ta dini Gadu hii juu musu taki soni di dë tuu. Sëmbë di ta lëgëdë an o go a di Könuköndë u Gadu (Efeise 4:25; Akoalimbo 21:8). Dee tuutuu bakama u Jesosi an ta taki doti taki. De an ta haika nasö taki dëë wojo woto. Fu di de ta fan soni di bunu, mbei de dë hii woto fasi ka de ta wooko, a siköö ku di pisi kamian ka de ta libi.​—Efeise 4:29, 31; 5:3.

[Peentje a bladsëidë 19]

Sëmbë di ta dini Gadu musu dë limbolimbo a hii fasi