Di u teni a fö woto
Unfa Jehovah Kötöigi seeka
Na un jaa ten Jehovah Kötöigi bigin. (1)
Andi dee Jehovah Kötöigi ta lei a dee komakandi u de. (2)
Unfa de ta paka dee kösutu di de ta mbei. (3)
Ambë ta tei fesi a hiniwan u dee gemeente. (4)
Un di da dee möön gaan komakandi di de ta abi hiniwan jaa. (5)
Andi da di wooko di ta du a dee hedi kantoo ku bijkantoo u de? (6)
1. A di ten fuu aki, Jehovah Kötöigi bigin a di jaa 1870. Fosu nöö sëmbë bi sabi de kuma sëmbë di ta öndösuku Bëibel. Ma a di jaa 1931, de tei di në, Jehovah Kötöigi. Di në aki dë fu feni a di Bëibel (Jesaja 43:10). Dee Jehovah Kötöigi an bi hia di de bi bigin. Ma nöunöu de göö ko toon milijunmilijun sëmbë, di ta peleiki fajafaja pasa a 230 köndë.
2. Di möön gaan pisi u dee gemeente u Jehovah Kötöigi abi komakandi dii pasi a wan wiki dendu. De ta kai i fu ko a hiniwan u dee komakandi dë (Hebelejën 10:24, 25). Di Bëibel da di buku ka de ta puu hii dee soni di de ta lei a dee komakandi u de. Dee komakandi ta bigin ku wan begi. Söseei a ta tapa ku wan begi tu. A möön gaansë u dee komakandi u de, de ta singi, singi ka de ta da Gadu gaandi ku hii de hati (Efesën 5:18, 19). Hiniwan sëmbë di kë sa ko a dee komakandi u de. A dee komakandi u de, de an ta pii möni a sëmbë.—Mateosi 10:8.
3. Gaansë u dee gemeente ta hoi dee komakandi u de a wan wosu di de ta kai Könuköndë zaal. Jehovah Kötöigi seei mbei gaansë u dee zaal aki söndö u de hakisi moni. Ja o si soni kuma pobiki, kölöisi, nasö woto soni te i go a di Könuköndë zaal dendu. De ta paka dee kösutu u de ku möni di dee Kötöigi seei ta buta, söndö taa wan sëmbë duwengi de. Hën da i ta buta möni fu di i seei kë. Da dee sëmbë di kë buta möni u paka u dee kösutu, bökusu dë a di zaal dendu u de sa butëën.—2 Kolente 9:7.
4. A hiniwan u dee gemeente, i abi owruman nasö sëmbë di musu luku di wooko. Te sëmbë musu kisi lei a di gemeente, nöö de ta tei fesi a di soni dë (1 Timoteo 3:1-7; 5:17). De ta kisi heepi u woto baaa di de ta kai dinai a di diniwooko (1 Timoteo 3:8-10, 12, 13). Dee womi di ta luku di wooko aki, an hei möön dee woto sëmbë a di gemeente (2 Kolente 1:24). De an da de apaiti në (Mateosi 23:8-10). Dee an ta bisi koosu a wan hii woto fasi möön dee woto sëmbë a di gemeente. Söseei dee an ta kisi möni u di wooko di de ta du a di gemeente. Ku hii de hati dee owruman aki ta luku taa soni waka bunu ku di gemeente kumafa Gadu kë. De ta da kötöhati ku tii di dë fanöudu te wan sëmbë abi fuka nasö booko hedi.—Jakobusi 5:14-16; 1 Petuisi 5:2, 3.
5. Jehovah Kötöigi sö seei ta hoi gaan komakandi hiniwan jaa. A di ten dë nöö u mëni gemeente ta ko a wan kamian u kisi apaiti lei u Bëibel. Wan soni di ta pasa hii juu te dee gaan komakandi ta hoi, da taa njunjun bakama u Jesosi ta dopu.—Mateosi 3:13-17; 28:19, 20.
6. Di hedikantoo u Jehovah Kötöigi dë a di foto di de ta kai, New York, na Amëikanköndë. Naandë seei wan kulupu owruman ta dë di abi sabi ku köni. De ta luku di wooko a hii dee gemeente a goonliba aki. Boiti di hedikantoo, i abi pasa 100 bijkantoo a wan lo kondë. A dee bijkantoo aki, i abi sëmbë di ta wooko söndö u hakisi moni. De ta mbei buku, nöö te de kaba de ta manda de go a woto kondë ku sipi. De ta da tii tu di dë fanöudu u seti di peleiki wooko a wan bunu fasi. Faandi mbei ja ta seeka soni u go luku di bijkantoo di dë zuntu ku kai i ta libi?