Andi ta pasa ku wan sëmbë te a dëdë?

Te wan sëmbë dëdë, hën da an ta libi möön. Dëdë dë kuma te wan sëmbë duumi fundu (Johanisi 11:11-14). Dee dëdë sëmbë an sa jei soni, de an sa si soni, de an sa fan, nasö de an sa pakisei na wan soni möön (Peleikima 9:5, 10). Poipoi biibi ta lei taa te wan sëmbë dëdë, nöö a nango a wan jeje köndë u go libi ku dee gaan sëmbë fëën. Bëibel an ta lei di soni aki.

Dee sëmbë dee dëdë an sa heepi u, söseei de an sa du hogi ku u tu. Sëmbë guwenti u du peipei fanöudu soni te wan sëmbë dëdë. De ta biibi taa te de du dee soni dë, nöö dee dëdë sëmbë hati o piizii ku de. Gadu an ta feni di soni dë bunu, biga di soni dë da wan u dee lëgëdë woto u Saatan. Dee dëdë sëmbë an sa piizii tu biga de an dë ku libi möön. Wa musu fëëë nasö dini dëdë sëmbë. Gadu wanwan tö u musu dini.​—Mateosi 4:10.

Dëdë sëmbë o toona ko a libi baka. Jehovah o weki dee dëdë sëmbë sö taa de sa libi a wan paladëisi a goonliba. Di juu dë musu ko jeti (Johanisi 5:28, 29; Tjabukama 24:15). Gadu sa weki dee dëdë sëmbë leti kumafa i sa weki wan sëmbë di ta duumi.​—Maikusi 5:22, 23, 41, 42.

Saatan Didibi hën paaja di lëgëdë buka taa wa ta dëdë. Saatan ku dee taku jeje fëën ta mbei sëmbë biibi taa de abi wan akaa di an ta dëdë. Söseei de ta biibi taa di akaa dë ta suwaki woto sëmbë, nöö a ta tja peipei fuka ko da de. So toon Saatan ta ganjan sëmbë ku sunjan nasö a ta mbei de si soni. A dë wan gaan hogi soni a Jehovah wojo te sëmbë ta pooba u fan ku dëdë sëmbë.​—Detolonomi 18:10-12.