Jesosi Keesitu da di Mësiasi di Gadu bi paamusi libisëmbë

JEHOVAH GADU bi mbei sömëni tjabukama sikifi soni buta a Bëibel, di bi o heepi u fuu ko sabi ambë bi o dë di Mësiasi. Dee tjabukama dë bi sikifi soni u di ten de bi o pai di Sëmbë di Gadu bi paamusi u manda ko heepi libisëmbë. De bi sikifi soni tu u di wooko di a bi o du ku söseei di fasi fa a bi o dëdë. Di Jesosi Keesitu bi dë a goonliba, nöö libi fëën bi kai ku hii dee soni dee tjabukama dë bi sikifi. A ta foondo u seei te u ta si taa hii dee soni dee tjabukama dë sikifi, pasa tuutuu leti kumafa de bi sikifi. Boo go luku wan tu soni de bi sikifi u di ten de bi o pai di Mësiasi ku di ten a bi dë piki mii.

Di tjabukama Jesaaja bi taki a fesi taa di Mësiasi bi o dë wan bakamii u Könu Dafiti (Jesaaja 9:7). Jesosi bi kumutu tuutuu a di lö u Dafiti.​—Mateosi 1:1, 6-17.

Mika, wan woto tjabukama u Gadu bi taki a fesi taa di mii dë bi o toon wan tiima ku söseei taa de bi o pai ën a „Betelehem Efalata” (Mika 5:2). A di ten de pai Jesosi, tu foto bi dë a Isaëli di de bi ta kai Betelehem. Wan u dee foto dë bi dë zuntu u Nazalëti a bau-së u di köndë. Nöö di wotowan bi dë zuntu u Jelusalen a di köndë Juda. A fesiten de bi ta kai di Betelehem di bi dë zuntu u Jelusalen, Betelehem Efalata. A di foto dë de pai Jesosi leti kumafa di tjabukama bi taki a fesi!​—Mateosi 2:1.

Wan woto tjabukama bi taki a fesi taa de bi o kai di Womi Mii u Gadu „puu a Egepiti köndë”. Di Jesosi bi dë piki mii, nöö de bi tjëën go a Egepiti köndë. Baka di Könu Helodi dëdë, nöö de toona kumutu a Egepiti. Sö wë di soni di tjabukama bi taki, ko tuu.​—Hosea 11:1; Mateosi 2:15.

A di pisi a bladsëidë 231 wanlö tëkisi dë, nöö a liba u de a sikifi „Tjabukama woto”. Dee tëkisi aki ta taki finifini u di Mësiasi. Gaantangi tei dee tëkisi aki maaka ku dee tëkisi dee sikifi a basu ka a sikifi „De ko tuu”. Te i du sö, nöö joo abi wan möön taanga biibi taa di Wöutu u Gadu ta taki tuutuu soni.

Te i ta luku dee tëkisi aki nöö fëëkëtë taa dee tëkisi ka dee tjabukama bi taki soni, bi sikifi höndöhöndö jaa ufö de pai Jesosi. Jesosi bi taki taa: „Sö dee soni o pasa ku mi leti kumafa de dë sikifisikifi a dee buku u Mosesi ku dee tjabukama, ku di Kanda Buku” (Lukasi 24:44). Kumafa i sa si a di Bëibel fii, dee soni dë pasa tuutuu leti kumafa de bi sikifi a fesi!