Unfa i sa ko abi wan suti wosudendu libi?

DI BËIBEL TA TAKI TAA

„Dee sëmbë dee ta jei di Wöutu u Masa Gadu ta piki ën buka, de ta dë waiwai!”​—Lukasi 11:28, Nyun-Grontapuvertaling.

DEE WINI DEE I SA FENI

Joo feni tuutuu lobi.​—Efeise 5:28, 29.

Sëmbë o ta lesipeki i tuutuu.​—Efeise 5:33.

Joo ko abi wan bööböö libi söndö panta.​—Maikusi 10:6-9.

U SA BIIBI TUUTUU ANDI DI BËIBEL TA TAKI Ö?

Aai, u tu soni hedi:

• Gadu hën seti di wosudendu libi. Di Bëibel ta taki taa, Jehovah Gadu hën toou di fosu womi ku di fosu mujëë (Kenesesi 2:18-24). Fëën mbei u sa taki taa Jehovah hën seti di wosudendu libi u di a bi kë sö. Faandi mbei u sa taki di soni aki?

  Boo taa i ta njan wan suti njanjan, hën i kë sabi ku andi de boi ën, ambë i bi o hakisi? Wë di sëmbë di boi ën i bi o hakisi.

  Sö a dë taa ee u kë ko sabi dee soni di sa mbei u abi wan suti wosudendu libi, nöö u musu suku lai a Jehovah, di sëmbë di seti di wosudendu libi.

• Gadu ta booko hën hedi ku i. A dë wan köni soni te sëmbë u wan wosudendu ta suku lai a Jehovah di dë u feni a di Wöutu fëën. Faandi mbei? „Biga a a’ toobi ku i” (1 Petuisi 5:6, 7). Jehovah a’ bunu fuu a pakisei, nöö dee lai fëën ta heepi u hii juu!​—Nöngö 3:5, 6; Jesaaja 48:17, 18.