I ta fii so juu kuma ja abi mati ö, nöö i ta fëëë u?

Luku di piki womi mii a di peentje aki. A dë hën wanwan, nöö a djei kuma a ta fëëë, na sö nö? I fii sö wan daka kaa u?— Hii sëmbë sa fii sö wan daka. Di Bëibel ta taki u mati u Jehovah di bi ta fii sö tu. De bi ta si kuma de an abi mati, nöö de bi ta fëëë tu. Elia bi dë wan u dee sëmbë dë. Boo luku andi bi pasa ku Elia.

Elia bi ta libi na awooten Isaëli, gaanduwe ufö de bi pai Jesosi. Di könu u Isaëli de kai Akab an bi ta dini di tuutuu Gadu Jehovah. Hën ku hën mujëë Iseibëli bi ta dini di taku gadu de kai Baali, ka u de bi dini Jehovah. Fëën mbei gaansë u dee Isaëli sëmbë bigi ta dini di taku gadu dë tu. Di mujëë könu Iseibëli bi abi takuhati, nöö a bi kë kii hii sëmbë di bi ta dini Jehovah. Elia bi dë a dendu tu! I saandi Elia du ö?—

Elia fusi kumutu a di köndë go a di sabana, hën a go tjubi a wan sitonu baaku! Faandi mbei i si kuma a du di soni aki?— Awa, a bi ta fëëë. Ma Elia an bi musu fëëë. Faandi mbei? Wë a bi sabi taa Jehovah bi sa heepi ën. Elia bi si kaa fa Jehovah abi kaakiti tjika. Wan daka, Jehovah piki di begi u Elia, di a bi mbei faja kumutu a liba ko tjuma wan soni a goonliba aki. Fëën mbei Elia bi sa dë seiki taa Jehovah bi o sa heepi ën!

Di Elia bi dë a di sitonu baaku, hën Jehovah ko fan ku ën. Jehovah hakisi ën taa: ’Andi i ta du aki.’ Hën Elia piki Jehovah taa: ’Mi wanwan tö nöö ta dini i jeti, nöö mi ta fëëë taa de o kii mi tu.’ Elia bi ninga taa de bi kii hii dee woto dinima u Jehovah tuu. Ma Jehovah piki Elia taa: ’ Na tuu, na sö a dë. Te kuma tide, 7000 sëmbë dë di ta dini mi jeti. An dë fii fëëë. Mi abi wooko da i di i musu du da mi jeti!’ I si kuma Elia bi wai di a jei di soni aki ö?—

Andi i sa lei u di soni di pasa ku Elia?— Nöiti i musu ta fii kuma ja abi mati, nöö an dë fii ta fëëë tu. I abi mati di lobi Jehovah, nöö de lobi i tu. Jehovah dë wan makiti Gadu, nöö hii juu a o ta heepi i! Ja ta wai fa i ko sabi taa ja dë i wanwan u?—