Jesosi bi ta piki dee sëmbë fëën buka hii juu

A ta taanga da i fii ta piki i mama ku i tata buka u?— So juu a ta taanga. I sabi taa Jesosi bi ta piki hën mama ku hën tata buka u, söseei taa a bi piki Jehovah buka tu ö?— Ee i ta djeesi Jesosi, nöö joo sa ta piki i mama ku i tata buka, aluwasi a ta taanga da i. Boo go luku unfa a bi du di soni aki.

Bifö Jesosi bi ko a goonliba aki, a bi dë ku hën Tata, Jehovah a liba ala. Ma Jesosi bi abi mama ku tata a goonliba aki tu. Hën tata de bi ta kai Josëfu, nöö hën mama de bi ta kai Malia. I saanfa de du ko dë Jesosi mama ku hën tata u?—

Jehovah bi du wan foombo soni seei. A bi mbei Malia ko dë ku bëë. Jehovah bi mbei Jesosi göö a Malia bëë dendu, leti kumafa woto mii ta göö a de mama bëë dendu. Baka nëigi liba, hën Malia pai Jesosi. A sö wan fasi Malia ku hën manu Josëfu ko dë di mama ku di tata u Jesosi a goonliba aki.

Di Jesosi bi abi 12 jaa, hën a bi du wan soni di bi lei fa a lobi hën Tata Jehovah tjika. Di soni aki pasa di Jesosi ku dee famii fëën bi waka di longi pasi u go hoi di Pasika a Jelusalen. Di de ta toona go baka a wosu, hën Josëfu ku Malia an sa feni Jesosi a na wan kamian. I sabi naasë a bi dë u?—

Hesihesi Josëfu ku Malia toona go baka a Jelusalen, hën de suku Jesosi a hii kamian. De bi ta booko de hedi seei, u di de an bi sa feni Jesosi. Ma baka dii daka ufö, hën de go feni ën a di wosu u Gadu! I sa faandi mbei Jesosi bi dë a di Wosu u Gadu ö?— Naandë a bi sa lei möön soni fëën Tata, Jehovah. A bi lobi Jehovah, nöö a bi kë lei unfa a sa mbei Jehovah dë ku wai. Hii fa Jesosi bi göö ko gaan womi, tökuseei a bi ta piki Jehovah buka hii juu. Aluwasi a bi ta taanga da Jesosi, tökuseei a bi ta piki Jehovah buka. So juu a bi musu tja sitaafu seei. Jesosi bi ta haika Josëfu ku Malia tu ö?— Aai, di Bëibel ta taki taa a bi ta haika de.

Andi i sa lei a di woto u Jesosi?— Ee a ta taanga da i seei, tökuseei i musu ta piki i mama ku i tata buka. Joo haika de u?—