Pisi 9
Dini Jehovah makandi ku i wosudendu
„Un musu begi Masa Gaangadu ta gafëën, di mbei liba ku goonliba.”—Akoalimbo 14:7
I bi lei a di buku aki taa di Bëibel abi sömëni mama wëti di o heepi i ku i wosudendu. Jehovah kë fuun ta dë waiwai. A paamusi unu taa ee un buta di dini fëën a di fosu kamian, „nöö hii dee [woto] soni . . . tuu woon feni” (Mateosi 6:33). Jehovah kë fuun ko dë mati fëën. Tei hii okasi di i feni u mbei i ku Jehovah toon möön gaan mati. Di soni aki da di möön gaan bunu di wan sëmbë sa feni.—Mateosi 22:37, 38.
1 KO DË MÖÖN GAAN MATI KU JEHOVAH
DI BËIBEL TA TAKI TAA: „Mi o dë unu Tata, nöö unu o dë womi mii ku mujëë mii u mi. Sö Masa Gadu taki e” (2 Kolenti 6:18). Gadu kë fii ko dë wan bunu mati fëën. Begi da wan u dee soni di sa heepi i u dë wan mati u Gadu. Jehovah kë taa ’un musu ta begi hiniwanten’ (1 Tesalonika 5:17). Jehovah dë kabakaba u haika andi i kë taki dëën, söseei a ta booko hën hedi ku i (Filipi 4:6). Te i ta begi makandi ku di wosudendu fii, nöö de o si fa i ku Gadu dë mati tjika.
Na fan nöö i musu ta fan ku Gadu, ma i musu ta haikëën tu. Wan fasi fa i sa ta haikëën, hën da te i ta lei soni a di Wöutu fëën, söseei a dee woto buku fuu dee ta taki soni u Bëibel (Psalöm 1:1, 2). Pakisei fundu u dee soni di i ta lei (Psalöm 77:11, 12). Wan woto fasi fa i sa ta haika Gadu, hën da te i nango hii juu a dee komakandi.—Psalöm 122:1-4.
Wan woto fasi fa i sa ko dë möön gaan mati ku Jehovah, hën da te i ta konda soni fëën da wotowan. Möön i ta konda soni u Jehovah, möönmöön joo ta ko zuntu ku ën.—Mateosi 28:19, 20.
SONI DI I SA DU:
Buta ten a wan së hiniwan daka u ta lesi di Bëibel, söseei u ta begi
Kuma wosudendu, un musu buta di dini u Gadu a di fosu kamian, nöö baka di dë ufö un sa buta dee soni kuma piizii nasö woto soni di i bi o kë du
2 MBEI A TA DË WAN PIIZII SONI TE UN TA HOI DI WOSUDENDU DINI FUUNU
DI BËIBEL TA TAKI TAA: „Pusa go a Gadu e, nöö Gadu seei o pusa ko a i tu” (Jakobosi 4:8). A dë fanöudu fii seti wan skeima sö taa hiniwan wiki un sa ta hoi di Wosudendu Dini (Kenesesi 18:19). Ma soni dë di i musu du jeti. A hiniwan daka fii libi i musu ta du soni ku Gadu a pakisei. Mbei dee sëmbë u di wosudendu fii ko dë gaan mati ku Gadu, u di i ta taki soni fëën „te u dë sindosindo a wosu, te un dë a pasi ta waka, te un kandi, ku te un hopo” (Detolonomi 6:6, 7). Mbei möiti u dë kuma Josua, di bi taa: „Mi ku mi wosudendu, woo dini Jehovah.”—Josua 24:15.
SONI DI I SA DU:
Abi di guwenti u ta lei dee sëmbë fii wosudendu soni u Gadu, nöö buta pakisei a dee soni di hiniwan u de abi fanöudu