Andi da di Könuköndë u Gadu?

DI BEIBEL TA TAKI TAA

„Di Gadu u liba ala o seti wan könuköndë di na o sa poi wan daka.”​—Daniëli 2:44, Nyun-Grontapuvertaling.

„De pai wan mii da u. De dëën di wooko u tii kuma gaama.”​—Jesaaja 9:6.

DEE WINI DEE I SA FENI

• Wan bumbuu tii di o mbei i feni bunu.​—Jesaaja 48:17, 18.

• Wan njunjun goonliba teka sëmbë an o ta siki möön, söseei teka de o ta dë waiwai.​—Akoalimbo 21:3, 4.

U SA BIIBI TUUTUU ANDI DI BEIBEL TA TAKI Ö?

Aai, tu soni mbei u sa biibi:

• Jesosi bi lei u a fesi andi di Könuköndë u Gadu o du. A bi lei dee bakama fëën u begi be di Könuköndë u Gadu ko, söseei u begi be di kë u Gadu pasa a goonliba aki (Mateosi 6:9, 10). Dee soni Jesosi bi du ta lei u unfa Gadu o piki di begi aki.

  Di Jesosi bi dë a goonliba aki, a bi da dee sëmbë dee hangi bi ta kii njanjan, a bi kula sikima, söseei a bi weki dëdë sëmbë! (Mateosi 15:29-38; Johanisi 11:38-44). Jesosi, di Tiima di o tii di Könuköndë u Gadu, bi lei u dee hanse soni di di Könuköndë u Gadu o du da dee sëmbë dee o dë a di tii dë basu.​—Akoalimbo 11:15.

• Dee soni dee ta pasa nöunöu a goonliba ta lei u taa di Könuköndë u Gadu o ko abiti möön. Jesosi bi taki a fesi taa kölö sö ufö di Könuköndë tja fii ko a di goonliba, gaan feti bi o ta feti a goonliba, gaan hangi bi o ko, söseei goonliba bi o ta seki ta latja kamian.​—Mateosi 24:3, 7.

  Hii dee soni aki tuu u ta si tide. Fëën mbei u sa dë seiki taa di Könuköndë u Gadu o puu hii dee fuka aki.