WOTO 51
Unfa i sa fan a wan fasi di ta kai ku Jehovah?
Di Jehovah mbei u, hën a mbei u fuu sa fan. Di fan di u sa fan, da wan gaan bunu soni seei. Jehovah ta booko hën hedi ku di fasi fa u ta fan u? Aai, a ta booko hën hedi! (Lesi Jakobosi 1:26.) Boo luku unfa u sa fan a wan fasi di ta kai ku Jehovah.
1. Unfa u sa fan a wan bunu fasi ku wotowan?
Di Bëibel ta piki u fuu ta da useei degihati ta heepi u na u fuu nango a fesi nöömö (1 Tesalonika 5:11). I sabi sëmbë di abi degihati fanöudu ö? Andi i sa du u mbei de fii möön bunu? Piki de taa i ta booko i hedi ku de. Kandë i sa piki de andi da wan soni u de di i lobi. I sabi wan Bëibel tëkisi di sa da wan sëmbë di i sabi degihati ö? Sömëni tëkisi dë di i sa tei u da wan sëmbë degihati. Hoi a pakisei taa di fasi fa joo taki wan soni sa da wan sëmbë degihati möön dee soni dee joo taki. Fëën mbei hii juu i musu ta pooba u fan a wan suti fasi ku wotowan.—Nöngö 15:1.
2. Unfa wa musu ta fan ku wotowan?
Di Bëibel ta taki taa: „Na mbei poipoi fan kumutu a i buka e.” (Lesi Efeise 4:29.) Di soni aki kë taki taa wa musu ta kosi sëmbë nasö ta da goofu woto, söseei wa musu ta taki soni u hati wotowan. Wa o ta taki hogi u sëmbë, söseei wa o ta taki soni u poi sëmbë në.—Lesi Nöngö 16:28.
3. Andi o heepi u fuu ta fan a wan fasi di o da wotowan taanga?
Möön gaanfa, dee soni dee u ta taki ta lei andi dë a u hati tuutuu, nasö andi u ta pakisei (Lukasi 6:45). Fëën mbei u musu ta mbei möiti u ta pakisei bunu soni hii juu. U musu ta pakisei tuutuu soni, soni di dë fanöudu, soni di bunu, soni di dë gbelingbelin a Gadu wojo ku soni di sëmbë ta du u lei taa de lobi wotowan (Filipi 4:8). Ee u kë ta pakisei dee soni aki, nöö u musu ta köni ku dee soni dee u ta luku nasö dee soni dee u ta haika, söseei u musu ta köni ambë u ta tei kuma mati (Nöngö 13:20). A o heepi u tu fuu pakisei bunu ufö u taki wan soni. Pakisei unfa dee soni dee joo taki o mbei wotowan fii. Di Bëibel ta taki taa: „Te sëmbë ta taki soni söndö u pakisei, nöö a dë kuma tjökö de ta tjökö wotowan ku wan feti ufangi, ma dee soni di köni sëmbë ta taki, ta kula wotowan.”—Nöngö 12:18.
WOTO SONI DI I SA LEI
Woo luku andi o heepi i fii ta taki soni di ta kai ku Jehovah, söseei di ta da wotowan degihati.
4. Pakisei bunu andi joo taki
So juu u ta taki soni di ta hati u bakaten (Jakobosi 3:2). Lesi Galasia 5:22, 23, nöö piki dee hakisi aki:
Undi u dee fasi aki i sa hakisi Jehovah faa heepi i fii ko abi fii sa ta fan bunu ku wotowan? Unfa dee fasi aki o heepi i?
Lesi 1 Kolenti 15:33, nöö piki di hakisi aki:
Unfa dee mati dee joo tei ku dee soni dee joo ta du u mbei piizii, sa mbei i ta fan ku wotowan?
Andi sa mbei i ko ta fan a wan fasi di an bunu?
Lesi Peleikima 3:1, 7, nöö piki di hakisi aki:
Na un ten a dë wan köni soni fii dë pii nasö fii suku di möön bunu ten u taki wan soni?
5. Taki bunu soni u wotowan
Andi sa heepi u fu wa taki soni di o mbei wotowan fii sen nasö di sa hati de? Pëë di FËLÖN, nöö piki dee hakisi aki.
Faandi mbei di baaa a di fëlön bi kë tooka di fasi fa a bi ta fan ku wotowan?
Andi a bi du fu an bi ta fan ku sëmbë sö möön?
Lesi Peleikima 7:16, nöö piki di hakisi aki:
Andi u musu hoi a pakisei te di fii ta ko a u, u taki hogi u wan sëmbë?
Lesi Peleikima 7:21, 22, nöö piki di hakisi aki:
Unfa di tëkisi aki sa heepi i u hati fii an boonu te wan sëmbë taki hogi fii?
6. Fan a wan bunu fasi ku dee sëmbë fii wosudendu
Jehovah kë fuu fan a wan suti fasi ku dee sëmbë fuu. Pëë di FËLÖN, nöö piki di hakisi aki.
Andi o heepi i fii fan a wan bunu fasi ku dee sëmbë fii wosudendu?
Lesi Efeise 4:31, 32, nöö piki di hakisi aki:
Unfa u musu fan ku dee sëmbë fuu wosudendu u de fii taa u lobi de?
Jehovah bi taki taa a lobi di womi mii fëën, Jesosi. Lesi Mateosi 17:5, nöö piki di hakisi aki:
Unfa i sa djeesi Jehovah a di fasi fa i ta fan ku dee sëmbë fii wosudendu?
Suku fasi u gafa woto sëmbë
SO SËMBË TA TAKI TAA: „Mi ta taki andi mi kë. Ma a’ toobi ee sëmbë lobi dee soni dee mi ta taki nasö ee de an lobi de.”
I si kuma di sëmbë abi leti u taki sö u? Faandi mbei i taki sö?
ANDI I LEI?
Dee soni dee u ta taki sa hati wotowan. Fëën mbei u musu pakisei bunu andi woo taki, unfa woo taki ën, söseei na un ten woo taki ën.
Andi i bi o piki?
Unfa i sa fan u da wotowan taanga?
Unfa ja musu ta fan ku wotowan?
Andi sa heepi u fuu ta fan a wan bunu fasi hii juu, söseei fuu ta taki soni di ta da wotowan taanga?
WOTO SONI DI I SA LUKU
Andi sa heepi u fuu ta taki soni di ta da wotowan taanga?
Lesi di woto aki fii si andi sa heepi i fu ja ta kosi.
„Na wan ogri sani fu kosi noso fu taki dotitaki?” (Woto a di website fuu)
Luku di fëlön aki fii si andi sa heepi i fu ja taki hogi u wotowan.
Lesi di woto aki fii si unfa Jehovah bi heepi wan womi fu an ta kosi möön.
„Mi bigin aksi misrefi fa mi libi o waka” (A Waktitoren, 1 u tanvuuwata-liba 2013)