WOTO 54
Ambë da „di köni saafu di dë u futoou”, nöö andi a ta du?
Jesosi da di hedima u di kemeente (Efeise 5:23). Nöunöu a dë a liba ala, nöö a buta „di köni saafu di dë u futoou” u tii dee bakama fëën dee dë a goonliba aki (Lesi Mateosi 24:45.) Hii fa di „saafu” aki abi di leti u du so soni, tökuseei a musu haika Keesitu, söseei a musu heepi dee baaa u Keesitu. Ambë da di saafu aki? Nöö unfa di saafu aki ta sölugu u?
1. Ambë da „di köni saafu di dë u futoou”?
Sensi na awooten, Jehovah bi lo’ u tei wan womi nasö wan piki kulupu u womi sëmbë u tii dee sëmbë fëën (Maleaki 2:7; Hebelejën 1:1). Baka di Jesosi dëdë, hën dee apösutu ku dee gaanwomi a Jelusalen bi ta tii dee sëmbë u Jehovah (Tjabukama 15:2). A di wan seei fasi, wan piki kulupu u gaanwomi ta tii dee sëmbë u Gadu a di ten aki. Di piki kulupu aki u ta kai di Tii Kulupu u Jehovah Kotoigi. Dee baaa aki ta lei u soni, söseei de ta tii di peleikiwooko a hii së u goonliba. De da „di köni saafu di dë u futoou di [Jesosi] buta” (Mateosi 24:45a). Hii dee baaa u di Tii kulupu da salufuwan. Baka te de dëdë, nöö de nango a liba ala u go tii makandi ku Jesosi a di Könuköndë fëën.
2. Un pei lei di saafu di dë u futoou ta da u?
Jesosi bi taki taa di köni saafu bi o „da [dee bakama fëën] njanjan a di soifi ten” (Mateosi 24:45b). Di njanjan aki da dee lei dee u ta feni a di Wöutu u Gadu. Leti kumafa njanjan ta da u kaakiti, söseei a ta mbei u dë gösöntu, sö nöö dee soni di de ta lei u ku di Wöutu u Gadu ta da u taanga fuu hoi useei a Jehovah go dou, söseei fuu du di wooko di Jesosi da u fuu du (1 Timoteo 4:6). U ta feni dee lei aki a dee komakandi, a dee keling komakandi ku dee könklësi. Nöö di köni saafu ta mbei buku ku fëlön tu, u heepi u fuu ko sabi andi da di kë u Gadu, söseei fuu ko dë möön gaan mati ku ën.
WOTO SONI DI I SA LEI
Woo si faandi mbei u abi „di köni saafu di dë u futoou” fanöudu.
Di Tii Kulupu ta lei dee Jehovah Kotoigi a hii së u goonliba soni, söseei de ta tii de ku di Wöutu u Gadu, nöö de ta heepi de a sömëni woto fasi tu.
3. Soni an ta waka fanjanfanjan a dee sëmbë u Jehovah mindi
Jesosi buta di Tii Kulupu u de ta tii di wooko di dee Jehovah Kotoigi ta du. A di wan seei fasi Jesosi bi ta tii dee fesiten Keesitu sëmbë. Pëë di FËLÖN.
Lesi 1 Kolenti 14:33, 40, nöö piki di hakisi aki:
Unfa dee tëkisi aki ta lei taa Jehovah an kë u soni waka fanjanfanjan a dee sëmbë fëën mindi?
4. Di saafu di dë u futoou ta tii di peleikiwooko di u ta du
Di peleikiwooko bi dë di möön fanöudu wooko di dee Keesitu sëmbë fu awooten bi ta du. Lesi Tjabukama 8:14, 25, nöö piki dee hakisi aki:
Ambë bi ta tii di peleikiwooko di dee Keesitu sëmbë fu awooten bi ta du?
Andi Petuisi ku Johanisi bi du di dee woto apösutu bi manda de go a Samalia?
Di peleikiwooko da di möön fanöudu wooko di di Tii Kulupu ta tii. Pëë di FËLÖN.
Jesosi bi lei u unfa di wooko aki dë fanöudu tjika. Lesi Maikusi 13:10, nöö piki dee hakisi aki:
Faandi mbei di peleikiwooko da wan fanöudu soni da di Tii Kulupu?
Faandi mbei u abi „di köni saafu di dë u futoou” fanöudu, u tii di wooko aki a hii së u goonliba?
5. Di saafu di dë u futoou ta tii dee sëmbë u Gadu
Di Tii Kulupu ta tii dee Jehovah Kotoigi dee dë a hii së u goonliba. Unfa de ta du ën? Luku unfa di Tii Kulupu a di ten u dee fesiten Keesitu sëmbë bi ta du ën. Lesi Tjabukama 15:1, 2, nöö piki dee hakisi aki:
Andi bi mbei taa so u dee Keesitu sëmbë fu awooten an bi ta kai a wan?
Na ambë Paulosu, Banabasi ku dee woto baaa bi go suku heepi u seeka di bookohedi dë?
Lesi Tjabukama 15:12-18, 23-29, nöö piki di hakisi aki:
Te di Tii kulupu fu awooten bi o du wan soni, nöö andi de bi ta du ufö de du di soni dë?—Luku vers 12, 15, ku 28.
Lesi Tjabukama 15:30, 31 ku 16:4, 5, nöö piki dee hakisi aki:
Andi dee Keesitu sëmbë fu awooten bi ta du te di Tii Kulupu bi piki de andi de musu du?
Unfa Jehovah bi mbei de feni gaan bunu u di de bi du soni kumafa di Tii Kulupu bi taki?
Lesi 2 Timoteo 3:16 ku Jakobosi 1:5, nöö piki di hakisi aki:
Andi dee baaa u di Tii Kulupu u di ten aki ta du ufö de du wan soni?
SO SËMBË TA TAKI TAA: „Ee i ta haika dee baaa u di Tii Kulupu, hën da i ta du andi libisëmbë ta taki.”
Andi ta lei i taa Jesosi ta tii dee baaa u di Tii Kulupu?
ANDI I LEI?
Di Tii Kulupu da „di köni saafu di dë u futoou”, di Jesosi buta. De ta tii dee sëmbë u Jehovah a hii së u goonliba, söseei de ta lei de soni ku di Wöutu u Gadu.
Andi i bi o piki?
Ambë buta „di köni saafu di dë u futoou”?
Unfa di Tii Kulupu ta sölugu u?
I ta biibi taa di Tii Kulupu da „di köni saafu di dë u futoou” ö?
WOTO SONI DI I SA LUKU
Lesi di woto aki fii si unfa di Tii Kulupu ta du di wooko u de.
„Wat is het Besturende Lichaam van Jehovah’s Getuigen?” (Woto a di website fuu)
Luku di fëlön aki di o heepi i fii dë seiki taa dee lei di di Tii Kulupu ta da u dë u futoou.
Luku di fëlön aki fii si unfa dee baaa u di Tii Kulupu ta si di wooko di Jesosi da de u de du
Luku di fëlön aki fii si unfa dee komakandi ku dee könklësi fuu ta lei taa Jehovah hën ta tii di Tii Kulupu