WOTO 55
Unfa i sa heepi di kemeente?
A hii së u di goonliba, milionmilion sëmbë ta dini Jehovah waiwai a dusudusu kemeente. De ta tei dee lei ku dee lai di de ta feni u bigi seei, nöö de ta dë kabakaba u heepi di kemeente a sömëni fasi. Sö a dë da i a di kemeente ka i dë tu ö?
1. Andi da wantu fasi fa i sa wooko ku di ten ku di kaakiti fii u heepi di kemeente?
Hii u tuu sa heepi di kemeente. Sëmbë dë a di kemeente ka i dë di an sa waka, nasö di ko gaandi kaa u? I sa nango ta tei de ku wagi tja go a dee komakandi ö? Nasö i sa heepi de ku woto soni di de abi fanöudu ö, kandë go bai soni a wënkë da de, nasö heepi de ku wooko di de musu du a wosu ö? (Lesi Jakobosi 1:27.) Boiti di dë, i sa ta heepi seeka di Könuköndë zali faa ta dë limbolimbo, söseei faa ta dë bumbuu. Sëmbë an ta duwengi u fuu du dee soni aki. U di u lobi Jehovah Gadu ku dee baaa ku dee sisa fuu, mbei u ta „dë kabakaba” u du dee soni aki.—Psalöm 110:3.
Baaa ku sisa di dopu sa du möön soni u heepi di kemeente. Baaa di nango a fesi a di biibi sa toon dinai, nöö bakaten de sa toon gaanwomi tu. Boiti di dë, baaa ku sisa di kë peleiki fajafaja, sa du di pioniliwooko. Nöö so baaa ku sisa sa go heepi mbei kamian ka u ta dini Gadu, nasö de sa foloisi go a wan woto kemeente di abi heepi fanöudu.
2. Unfa u sa wooko ku di möni fuu ku dee woto soni dee u abi u heepi di kemeente?
U sa „gafa Jehovah ku dee gudu dee u abi” (Nöngö 3:9). U ta tei ën u bigi seei taa u sa da möni ku woto soni u heepi di kemeente, söseei u heepi du di peleikiwooko di u ta du a hii së u goonliba. (Lesi 2 Kolenti 9:7.) Dee baaa ta tei dee möni dee u ta da u heepi te wan gaan hogi pasa. Sömëni baaa ku sisa ta buta möni a wan së u de sa heepi. (Lesi 1 Kolenti 16:2.) U sa buta möni a dee möni këdë fuu dee dë a di komakandi kamian, nasö u sa go a di website fuu a donate.jw.org u da möni. Jehovah ta da hii u tuu di okasi fuu lei taa u lobi ën. Wan fasi fa u ta lei taa u lobi Jehovah, hën da te u ta da möni nasö woto soni di u abi u heepi di kemeente.
WOTO SONI DI U SA LEI
Woo luku wantu fasi fa i sa heepi di kemeente.
3. U sa da dee soni dee u abi u heepi
Jehovah ku Jesosi lobi ën te sëmbë ta da soni ku hii de hati. Jesosi bi gafa wan pooti mujëë di manu fëën dëdë, u di a bi da möni ku hii hën hati, hii fa a bi pooti. Lesi Lukasi 21:1-4, nöö piki dee hakisi aki:
Ku dee sëmbë dee ta da hia möni nöö Jehovah ta wai ö?
Unfa Jehovah ku Jesosi ta feni ën te sëmbë ta da möni ku hii de hati?
Ee i kë sabi unfa dee baaa ta wooko ku dee möni dee u ta da, nöö pëë di FËLÖN. Baka di dë, nöö piki di hakisi aki.
Andi ku andi dee baaa ta du ku dee möni dee u ta da u heepi dee kemeente a hii së u goonliba?
4. U sa heepi ku hii wooko
Dee dinima u Jehovah fu awooten bi ta wooko taanga u seeka dee kamian ka de bi nango dini Gadu. Na möni wanwan nöö bi dë fanöudu u du dee wooko aki. Lesi 2 Kloniki 34:9-11, nöö piki di hakisi aki:
Unfa hiniwan Isaëli sëmbë bi ta heepi seeka di wosu u Jehovah, nasö di kamian ka de bi ta dini ën?
Ee i kë si unfa dee Jehovah Kotoigi ta du di seei soni, nöö pëë di FËLÖN. Baka di dë, nöö piki dee hakisi aki.
Faandi mbei a dë fanöudu fuu ta seeka dee Könuköndë zali u de ta de limbolimbo, söseei u de ta dë bumbuu?
Andi da wantu fasi fa i sa heepi?
5. Baaa sa mbei möiti u du möön hia soni a di kemeente
Di Bëibel ta da dee baaa degihati u de du hii soni di de sa du u heepi di kemeente. Ee i kë si unfa de sa du di soni aki, nöö pëë di FËLÖN. Baka di dë, piki di hakisi aki.
Andi Ryan bi du faa bi sa du möön soni a di kemeente?
Di Bëibel ta piki u unfa wan baaa musu tja hënseei faa sa ko dë wan dinai, nasö wan gaanwomi. Lesi 1 Timoteo 3:1-13, nöö baka di dë, piki dee hakisi aki:
Andi dee baaa dee kë toon dinai, nasö gaanwomi musu du?
Unfa dee sëmbë fëën wosudendu musu ta tja deseei?—Luku vers 4 ku 11.
Te dee baaa ta mbei möiti u toon dinai nasö gaanwomi, nöö unfa di soni dë ta tja wini ko da di kemeente?
WAN SËMBË SA HAKISI I TAA: „Naasë dee Jehovah Kotoigi ta feni möni u du di wooko u de?”
Andi i bi o piki ën?
ANDI I LEI?
Jehovah ta wai te u ta wooko ku di ten fuu, di kaakiti fuu, di möni fuu ku dee woto soni fuu dee u abi u heepi di kemeente.
Andi i bi o piki?
Unfa u sa wooko ku di ten fuu, ku di kaakiti fuu u heepi di kemeente?
Unfa u sa wooko ku di möni fuu ku dee woto soni dee u abi u heepi di kemeente?
Andi ku andi i sa du u heepi di kemeente?
WOTO SONI DI I SA LUKU
Lesi di woto aki fii si faandi mbei dee dinima u Gadu an ta paka di u teni pisi möön.
„Bijbel e taki dati wi musu pai kerki wan di fu tin pisi fu wi moni?” (Woto a di website fuu)
Di Bëibel ta lei u andi da so wooko di baaa di dopu sa du. Ma unfa a dë ee wan sisa musu du dee wooko dë?
„Andi da di faantiwöutu u dee gaanwomi a di kemeente?” (Di Hei Wakitimawosu u bakajailiba 2021)
Luku di fëlön aki fii si unfa wantu baaa ta du hii soni di de sa du, u mbei dee woto baaa ku sisa feni dee buku di de abi fanöudu.
A di woto aki joo ko si taa di fasi fa di ölganisaasi fuu ta feni möni tooka ku dee woto keiki.
„Pe Yehovah Kotoigi e feni a moni fu man du a wroko fu den?” (Woto a di website fuu)