Lei sëmbë soni a wan fasi di an taanga u fusutan

Andi Jesosi bi du?

FËLÖN: Jesosi ta lei fa u Tata ta booko hën hedi ku u tjika

1. Luku di FËLÖN, nasö lesi Mateosi 6:25-27. Baka di dë, nöö i buta pakisei a dee soni aki:

1. Unfa Jesosi bi lei taa Jehovah ta booko hën hedi ku u?

2. Hii fa Jesosi bi sabi soni u fou bumbuu, tökuseei a bi buta pakisei a wan kodo soni nöö. Andi da di soni dë? Faandi mbei u sa taki taa a dë wan bunu fasi u lei sëmbë soni?

Andi u ta lei a Jesosi?

2. Te u ta lei sëmbë soni a wan fasi di an taanga u fusutan, nöö de an o fëëkëtë dee soni dee u lei de, söseei dee soni dë o dou de hati.

Djeesi Jesosi

3. Na fan hia poi. Na konda hii soni di i sabi u wan woto da di sëmbë, ma buta pakisei a dee soni dee dë a di buku di i ta lei ën soni. Baka te i hakisi ën wan soni, nöö wakiti pikisö u di sëmbë piki. Ee an sabi di piki, nasö ee a taki wan soni di an ta kai ku di Bëibel, nöö buta hakisi dëën u heepi ën faa kai pakisei a di soni. Te di sëmbë fusutan di möön fanöudu soni kaa, nöö go dou ku di lei di i ta lei ën soni.

4. Heepi di sëmbë di i ta lei soni faa wooko ku dee soni dee a sabi kaa, faa ko fusutan njunjun soni. Boo taa joo bigi wan woto di ta taki u di weki di sëmbë di dëdë o weki ko a libi baka. I sa taki kölö sö ku di sëmbë u di soni di a sabi kaa u sëmbë di dëdë.

5. Konda woto a wan köni fasi. Ufö i konda wan woto u heepi wan sëmbë faa ko fusutan wan soni möön bunu, nöö hakisi iseei dee soni aki:

1. ’Di woto an taanga u fusutan u?’

2. ’Di sëmbë o fusutëën wantewante u?’

3. ’A o heepi di sëmbë di mi ta lei soni fu an fëëkëtë di möön fanöudu soni di a musu lei ö?’