DI WOTO DI NAMA KU DI KAFITI | ANDI SA HEEPI U TE U ABI BOOKOHEDI?

Bookohedi dë a hii së u goonliba!

„Mi bi go bai soni u njan a wënkë, ma kuku nöö de bi abi ta sei. De bi ko dii un mëni toon möön fa mi bi guwenti u bai de! Di debooko fëën, na wan soni u njan bi dë u bai a wënkë seei.”—Paul, Zimbabwe.

„Mi manu kai mi ko sindo, hën a piki m’ taa a o go disa mi ku dee mii. Unfa mi o sa tja sö wan soni? Andi o pasa ku dee mii u mi?”—Janet, Amëëkanköndë.

„Te mi ta jei di soni de ta kai sireine ta bai, nöö mi ta kai tapa bëë a goon biga mi sabi taa dee bömu o piki. Te dee bömu piki kaa, nöö baka sömëni juu longi, maun u mi ta fika ta tëëmë jeti.”—Alona, Isaëli.

Wan womi ta booko ën hedi ku dee gaan feti dee ta feti a goonliba, di pena di sëmbë ta pena, di siki di sëmbë ta siki, ku dee fuka u di libi

U ta libi a „wan tumisi hogi ten” ka sëmbë abi bookohedi seei (2 Timoteo 3:1). Sömëni sëmbë abi möni fuka, soni an nango bunu a de wosudendu, gaan feti ta feti a goonliba, taku siki ta kii hia sëmbë, soni kuma wata nasö ventu, nasö libisëmbë seei ta booko dee kamian ka sëmbë ta libi. Boiti dee soni aki, sëmbë ta booko de hedi ku woto soni tu. De ta hakisi deseei: ’Dee logologo soni dee mi ta fii a mi sinkii aki sa dë kankël ö? Unfa di goonliba aki o dë da dee mii dee o kai mi avo?’

So juu a ta bunu te u ta booko u hedi ku soni. Te u musu mbei wan lepetisi, te u musu du wan soni a sëmbë fesi, nasö te u nango suku wooko, nöö u ta booko u hedi. Te u ta fëëë hogi, nöö wa o go du soni di sa tja hogi ko miti u. Ma te u ta booko u hedi pasa maaka, nöö a sa tja hogi ko da u. De bi öndösuku möön leki 68.000 sëmbë. De bi ko si taa dee sëmbë dee bi ta booko de hedi ku pikipiki soni bi ta dëdë möön hesi. Fëën mbei Jesosi bi hakisi wanlö sëmbë taa: „Undi fuunu sa libi tjë sö seei . . . , fu di i ta booko hedi mbei?” Awa, an ta tja wini ko da wan sëmbë te a ta booko hën hedi ku soni pasa maaka. Fëën mbei Jesosi bi taki taa: ’Ja musu ta booko i hedi’ (Mateosi 6:25, 27). Ma di soni dë kan u?

Woo sa du sö wan soni ee u ta tei dee köni lai u Bëibel, te u ta biibi a Gadu, ku te u abi di taanga biibi taa soni o waka bunu a di ten di ta ko. Kandë wa dë ku gaan bookohedi nöunöu, ma soni sa tooka wan daka. Fëën mbei boo go luku unfa dee soni dee u bi taki aki bi heepi Paul, Janet ku Alona ku dee bookohedi u de.