Di fasi fa Gadu bi ta si feti a di ten u dee fosu Keesitu sëmbë

Andi bi pasa? Faandi mbei Gadu an bi feti da dee Dju kumafa a bi du ën a di ten di bi pasa? Nöö faandi mbei an bi da de pasi u go feti u puu deseei a dee fuka u de basu? Gadu bi ko ta si feti wan woto fasi ö? Wë nönö. Ma dee Dju, de bi ko tooka. De an bi tei Jesosi, di Womi Mii u Gadu, kuma di Mësiasi (Tjabukama 2:36). Fëën mbei Gadu disa dee Isaëli sëmbë. An bi kë de kuma apaiti sëmbë fëën möön.​—Mateosi 23:37, 38.

Gadu an bi ta tjubi dee Dju ku di Paamusi Köndë u de möön. Boiti di dë, dee Dju an bi sa taki nöiti möön taa Gadu seei hën bi ta manda de u de go feti, nasö taa a bi ta heepi de ta feti. Kumafa Jesosi bi taki a fesi, wan woto föluku hën bi o feni dee bunu di dee Isaëli sëmbë bi o feni, u di Gadu bi feni de bunu. Bakaten di Bëibel bi kai di njunjun föluku dë „dee Isaëli sëmbë u Gadu” (Galasia 6:16; Mateosi 21:43). A bi ko dë gbelingbelin u si taa di kemeente u Keesitu sëmbë di Gadu salufu ku di santa jeje fëën, hën da dee Isaëli sëmbë u Gadu. Fëën mbei Petuisi bi piki de taa: „Fa u dë aki un ko dë wan apaiti sëmbë fu Gadu.”​—1 Petuisi 2:9, 10.

Dee fosu Keesitu sëmbë bi ko dë dee ’sëmbë u Gadu’. Ma u di soni dë mbei Gadu bi o feti da de u puu de a dee Loomë sëmbë basu ö? Naa a bi o da de pasi u hopo feti ku dee sëmbë dee bi ta pena de? Wë nönö. Faandi mbei? Te Gadu hën bi manda sëmbë u go a feti, nöö hën wanwan bi ta taki na un ten de bi musu feti, kumafa u bi si a di woto ufö disi. Gadu an bi feti da dee fosu Keesitu sëmbë, söseei an bi da de pasi u de go feti tu. U ta fusutan gbelingbelin taa a di ten dë di juu an bi dou jeti u Gadu feti u puu hogidu ku di pena di sëmbë ta pena wotowan.

Leti kumafa dee dinima u Gadu fu awooten bi musu wakiti u di juu dou u Gadu puu hogidu ku di pena di sëmbë ta pena wotowan, sö nöö dee fosu Keesitu sëmbë bi musu wakiti tu. A di pisiten di de bi ta wakiti dë, Gadu an bi da de pasi u de hopo feti ku dee felantima u de. Jesosi Keesitu bi ta lei sëmbë di soni aki gbelingbelin. An bi lei dee bakama fëën u de feti, ma a bi piki de taa: „Un musu lobi dee felantima fuunu e. Un musu ta begi da dee sëmbë dee ta du hogi ku unu” (Mateosi 5:44). Di Jesosi bi piki dee bakama fëën taa dee sodati u Loomë bi o ko feti ku Jelusalen, nöö a bi lei de taa de an bi musu fika naandë u de feti ku de. Ma a bi piki de u de kule kumutu a di köndë. Nöö de bi du kumafa a taki.​—Lukasi 21:20, 21.

Boiti di dë, di santa jeje bi mbei apösutu Paulosu sikifi taa: „Wan musu paka hogi ku hogi baka . . . Wan jei fa Gadu taki a di Buku ö? A taa: . . . ’Te wan sëmbë du hogi, nöö mi o pakëën nöömö’. Sö Masa Gadu taki” (Loomë 12:19). Aki Paulosu bi taki wan soni di Gadu seei bi taki höndöhöndö jaa a fesi. Di soni dë sikifi a Leifitiki 19:18 ku Detolonomi 32:35. Kumafa u bi si a di woto ufö disi, Gadu bi ta heepi dee sëmbë fëën na awooten te de bi ta feti ku dee felantima u de. Di soni di Paulosu taki aki ta lei taa di fasi fa Gadu ta si feti, an tooka. Hën da a di fosu jaahöndö, Gadu bi ta si feti kuma wan fasi u heepi dee dinima fëën jeti, u kumutu a dee sëmbë dee bi ta pena de basu, ku dee ta du hogihati soni ku sëmbë. Ma kumafa a bi dë na awooten, Gadu wanwan nöö bi ta taki na un ten de bi musu go feti, söseei ambë ku ambë bi musu go feti.

U ta fusutan gbelingbelin taa Gadu an bi ta da dee fosu Keesitu sëmbë pasi u de go a feti. Ma unfa a dë a di ten fuu aki? Gadu da wan kulupu sëmbë pasi u de go feti a di ten aki ö? Naa di ten dou u Gadu seei hopo feti u heepi dee dinima fëën? Unfa seei Gadu ta si feti a di ten aki? Di lasiti woto di woo luku o lei u fa a dë tuutuu.