Unfa a du ko taa di Bëibel dë te kuma tide jeti?

Di Bëibel dë te kuma tide jeti. Fëën mbei i sa abi wan Bëibel, di i sa lesi tu. Te i tei wan Bëibel di de puu ko bunu a di töngö di i kë lesi ën, nöö i sa dë seiki taa di soni di i ta lesi da soni di dë u futoou.a Ma nöö unfa a du ko taa di Bëibel dë te kuma tide jeti, hii fa de bi sikifi ën a soni di bi sa poi hesihesi? Unfa a du ko taa a dë u feni jeti, hii fa sëmbë bi mbei möiti u tooka di bosikopu di bi sikifi nëën? Faandi mbei di Bëibel dë sö wan apaiti buku?

Sömëni sëmbë di öndösuku soni u Bëibel ta pakisei nöunöu kumafa apösutu Paulosu bi ta pakisei. Paulosu bi sikifi taa: „Di fa hii dee pisipisi u di Buku u Gadu bi sikifi dë, nöö di Akaa [jeje, NW] fëën seei wë ko a peipei sëmbë liba fu de sikifi de e” (2 Timoteo 3:16). Dee sëmbë dë ta biibi taa di Bëibel dë te kuma tide jeti, u di hën da di Wöutu u Gadu, söseei u di Gadu mbei di bosikopu fëën dë u feni te kuma tide. Faizal, di u bi taki fëën a di fosu woto, bi buta taa a bi o go öndösuku ee di Bëibel da di Wöutu u Gadu tuutuu. A foondo seei u dee sömëni soni di a ko sabi. A ko si taa sömëni u dee soni di dee keiki ta lei sëmbë an ta kai ku di Bëibel. Boiti di dë, a bi ko lobi dee soni di Gadu abi a pakisei da di goonliba di dë a di Wöutu u Gadu.

Faizal taki taa: „Nöunöu mi dë seiki taa di Bëibel da wan kado di Gadu da u. Ee Gadu bi sa mbei liba ala ku goonliba aki, nöö a musu u dë sö taa a abi di makiti u da u wan buku söseei a abi di makiti u tjubi ën da u fuu sa feni a di ten aki. Ee u si kuma an bi o sa, hën da a bi o dë kuma i ta taki taa Gadu an abi hii makiti! Ambë da mi u mi taki di soni aki?”​—Jesaaja 40:8.