Faandi mbei di gaan soni di Gadu du da u dë sö wan apaiti soni?

AMBË DA I DI SONI?

U ta tei so soni di sëmbë da u u bigi, u di di sëmbë di da u de, dë wan heihei sëmbë nasö wan sëmbë di u lobi seei. Ma kandë wan sëmbë da u wan soni di an dii, ma tökuseei u ta tei ën u bigi, u di di sëmbë dë da wan famii fuu di u lobi seei nasö wan gaan mati fuu. Sö di soni di Russell bi da Jordan an bi dë wan diidii soni, kumafa u bi si a di fosu woto. Ma a bi tei ën u bigi seei. Unfa di soni aki nama ku di lusupaima, di dë di gaan soni di Gadu du da u?

Di fosu soni di di Bëibel ta piki u, hën da „[Gadu] tei di wan kodo Womi Mii fëën tö di a abi, manda ko a di goonliba aki fuu sa feni di teego libi u Masa Gadu” (1 Johanisi 4:9). Di soni aki hën mbei u ta tei di lusupaima u bigi seei. Woto sëmbë an dë di hei möön Gadu. Wan Hebelejën womi di sikifi soni a di buku Psalöm, bi taki taa: „Di në fii da Jehovah. I wanwan tö da di Kaba Heiwan u hii mundu” (Psalöm 83:18). Wan woto sëmbë an dë di hei kuma hën di bi o sa du sö wan gaan soni da u.

Di u tu soni di di Bëibel ta piki u, hën da Gadu da „u Tata” (Jesaaja 63:16). Na un futu? Wë hën da u libi. Nöö hii juu a ta booko hën hedi ku u, kumafa wan tata di lobi dee mii fëën ta booko hën hedi ku de. Gadu bi hakisi dee sëmbë fëën u Efalahim taa: „Na Efalahim da di lobi womi mii u mi ö, nöö nëën da di wojo mii u mi ö? . . . Hii juu a ta dë a mi pakisei. Mi ta fii tjali a mi hati u di soni dë hedi. Aluwasi andi ta pasa, tökuseei mi o tjali fëën hedi” (Jelemia 31:20). Di seei fasi nöö Gadu ta fii da dee dinima fëën a di ten aki. Hën da di Gadu di mbei u, nöö a abi hii makiti, ma hën da di Tata ku di Mati fuu tu, di an ta disa u möönsö. Di soni aki an musu mbei u ta tei hiniwan soni di a ta da u u bigi ö?

FAANDI MBEI DI SËMBË DA I DI SONI?

U ta tei so soni di sëmbë da u u bigi, u di di sëmbë da u ën u di a lobi u, ma na u di woto sëmbë duwengi ën faa da u ën. Wan sëmbë di ta da wotowan soni ku hii hën hati, an o ta suku u di sëmbë toona du wan bunu dëën baka.

Gadu mbei di Womi Mii fëën ko dëdë da u, u di a lobi u. Di Bëibel ta taki taa: „Masa Gadu lobi u tuu. Biga a tei di wan kodo Womi Mii fëën tö di a abi, manda ko a di goonliba aki.” Faandi mbei a du ën? Wë „fuu sa feni di teego libi” (1 Johanisi 4:9). Gadu bi musu u du di soni aki ö? Wë nönö! Di dëdë di „Jesosi Keesitu dëdë paka faa puu u a hogi basu” ta lei taa Gadu abi „bunuhati” seei.​—Loomë 3:24.

Unfa di soni di Gadu du da u ta lei taa a abi „bunuhati”? Di Bëibel ta taki taa: „Gadu lei u taa di lobi fëën pasa di dë gaanduwe. Biga na bumbuu sëmbë a manda Keesitu ko dëdë da e, ma u dee takulibima aki wë” (Loomë 5:8). U di Gadu lobi u tuutuu, mbei a bi du wan soni u heepi u kuma zöndu libisëmbë di an sa heepi deseei. An bi musu u lobi u sö, nöö wa o sa toona pakëën tu. Di soni aki da di möön gaan soni di wan sëmbë du u lei taa a lobi wotowan.

ANDI DI SËMBË BI MUSU DU U DA I DI SONI?

U ta tei so soni di sëmbë da u u bigi seei, u di di sëmbë dë bi musu mbei möiti faa bi sa da u sö wan soni. Te wan sëmbë dë kabakaba u da u wan soni di a lobi seei, nöö u ta möön tei ën u bigi seei te a da u ën.

Gadu ’da u di wan kodo Womi Mii fëën di a abi’ (Johanisi 3:16). An bi sa da u wan woto sëmbë di a möön lobi möön di Womi Mii fëën. A hii di pisiten di Gadu bi ta mbei mundu ala, Jesosi bi wooko makandi ku ën, nöö a bi ko toon di sëmbë di „bi ta mbei a ta piizii seei” (Nöngö 8:30). Jesosi da di „lobi Womi Mii” u Gadu, nöö „ee i si di Womi Mii fëën dë”, nöö a dë kuma „Masa Gadu seei i si dë kaa” (Kolosën 1:13-15). Tu sëmbë an dë di dë gaan mati sö wan daka.

Ma Gadu ’an hoi di fëën seei Mii a baka’ (Loomë 8:32). Ma Jehovah da u di möön bunu soni di a abi. Na wan soni di a da u, dii kuma di Womi Mii fëën.

DI SONI TA TAPA WAN FUKA DI U ABI

U ta tei so soni di sëmbë da u u bigi seei, u di a ta tapa wan fuka da u wantewante. Wë ee i bi siki wan gaan siki, hën ja sa paka dee data kösutu fii, nöö i bi o dë ku tangi a hati seei ee wan sëmbë paka de da i! Di soni dë bi o bigi da i seei.

„Leti kumafa hii sëmbë musu dëdë fu di de da bakamii u Adam, nöö söseei dee sëmbë u Keesitu o toona weki baka a dëdë tu fu de feni libi” (1 Kolenti 15:22). U di u da bakamii u Adam, mbei hii u tuu ta „dëdë”. Fëën mbei hii u tuu ta siki, nöö wa sa du na wan soni u ko bunu ku Gadu baka nasö fu an ta si u kuma zöndu libisëmbë. U kuma zöndu libisëmbë, an sa da useei ku woto sëmbë „libi”. Di Bëibel ta taki taa: „Na wan u de sa puu wan woto sëmbë a fuka, aluwasi andi de ta du, nöö de an sa paka Gadu faa bai di sëmbë dë puu a zöndu basu . . . Nöiti wan libisëmbë o sa pakëën” (Psalöm 49:7, 8). U abi heepi fanöudu tuutuu. U wanwan an bi o sa paka di lusupaima. Soni seei an bi o dë, di bi o sa heepi u.

U di Jehovah lobi u gaanfa seei, mbei a bi dë kabakaba u paka di paima di u bi abi fanöudu, sö taa ku di dëdë u Jesosi, „hii u tuu sa ko a libi baka”. Unfa di lusupaima ta mbei di soni aki pasa? „Fu di Jesosi Keesitu, di Mii u Gadu, lasi ën buuu fuu hedi kaa, nöö Masa Gadu ta puu dee hogilibi fuu tuu a u hati fuu ta dë limbolimbo.” Awa, ee u abi biibi a di buuu u Jesosi di kai a goon fuu hedi, nöö Gadu o sa da u paadon u dee zöndu fuu, söseei woo sa libi u teego (1 Johanisi 1:7; 5:13). Nöö unfa di lusupaima o sa heepi dee sëmbë fuu dee dëdë kaa? „Leti kumafa i si a dë taa wan libisëmbë tja dëdë ko ta kii hii sëmbë, nöö söseei di wan Libisëmbë [Jesosi] di hoi Gadu wëti dë tja weki baka a dëdë ko dou a hii sëmbë tu.”​—1 Kolenti 15:21.a

Na wan heihei sëmbë di abi sö wan gaan lobi, bi o sa da u wan soni di bigi möön di dëdë di Gadu manda Jesosi ko dëdë da u. Na wan woto sëmbë bi da wotowan wan soni di bi kösutu ën sö dii kuma di soni di Jehovah du da u. Söseei na wan woto soni dë di sëmbë bi o sa da u, di bi o sa puu u a zöndu ku dëdë maun. Awa, na wan soni di wan sëmbë bi o sa da u, u sa tei maaka ku di lusupaima.