Te a ta djei kuma di libi ta taanga da i poi

Wan mujëë de kai Sally,a di bi lasi gaansë u dee soni fëën di wan gaan ventu bi ko booko di kamian ka a ta libi, taki taa: „Mi bi ta fii kuma ma bi o sa tjëën möön. Sömëni daka baka di dë, mi bi ta fii taa a bi hebi da mi poi.”

Wan woto soni di sa taanga da i, hën da te wan sëmbë fii lasi libi. Wan mujëë de kai Janice, di ta libi a Ösutualia taki taa: „Di dee tu womi mii u mi dëdë, mi bi musu mbei möiti u libi go dou, hii fa a bi dë kuma libi u mi bi poi kaba a sösö. Mi bi begi Gadu, hën mi piki ën taa: ’Hati u mi an sa tja di soni aki möön! Mi begi i, be mi duumi, nöö ma weki möön.’”

Wan womi de kai Daniel, bi fii bookosaka gaanfa seei di hën mujëë bi waka dëën. A taki taa: „Di mi mujëë piki mi taa a bi waka da mi, nöö a bi dë kuma de tjökö mi a hati ku wan faka. Di soni di mi mujëë bi du aki bi ta mbei mi ta fii pen sömëni liba longi.”

Wan u dee soni dee sikifi a basu aki ta mbei fuka miti i ö? I ta tja pen u wan u dee soni aki hedi ö?

• Wan gaan hogi pasa

• Wan sëmbë fii lasi libi

• I mujëë nasö i manu waka da i

• I abi wan siki di data an sa kula

• Di libi ta hebi da i poi

Di Hei Wakitimawosu aki o lei i taa i musu kë libi go dou jeti, hii fa dee fuka aki ta miti i. Boo luku fosu andi sa heepi u te wan gaan hogi pasa.