Di pampia di u ta paati u kai sëmbë u ko a di könklësi
1. Na un ten woo bigi paati di pampia u kai sëmbë da di könklësi?
1 Ee i mbei möiti boi wan njanjan da dee famii fii nasö wan tu mati fii, nöö joo dë waiwai seei u kai de u ko njan ku i, nasö u? Wë sö nöö de mbei möiti u seeka dee lei dee woo kisi a di könklësi di ta ko. Jehovah ta da u di gaandi u kai sëmbë u ko a di könklësi, nöö dii wiki ufö di könklësi bigi woo bigi kai sëmbë. Andi o heepi u fuu dë fajafaja te woo paati di kai da sëmbë?
2. Andi o heepi u u mbei hii möiti u dë fajafaja te woo paati dee kai da sëmbë?
2 Ee u ta tei dee lei dee Jehovah ta da u a dee könklësi u bigi, söseei ee u ta pakisei u dee wini dee u ta feni, nöö woo mbei hii möiti u dë fajafaja te woo paati dee kai da sëmbë (Jes. 65:13, 14). Wa musu fëëkëtë tu taa hiniwan jaa sömëni sëmbë ta ko a dee könklësi u di u ta paati di kai da de (Luku di pisi „A ta tja wini ko”.) So u dee sëmbë dee woo kai u ko a di könklësi, o ko, ma wotowan an o ko. Aluwasi sëmbë o ko nasö de an o ko, tökuseei di möiti di u mbei u kai sëmbë ta tja gafa ko da Jehovah, söseei a ta lei fa Jehovah ta da sëmbë hia soni tjika.—Ps. 145:3, 7; Ako. 22:17.
3. Unfa woo paati dee kai da sëmbë?
3 Hii dee gaanwomi u dee kemeente musu luku unfa de o seti soni u paati dee kai a hii di pisiwata ka de ta peleiki. Söseei de musu taki na un ten dee peleikima sa bigi disa dee kai da dee sëmbë dee an dë a wosu, nasö na un ten de sa bigi paati de a sitaati a di pisiwata ka de ta peleiki. A sata ku sonde de sa ta paati dee kai makandi ku di Waktitoren ku dee bochure fuu. Te u kaba paati dee kai da sëmbë, nöö woo dë waiwai seei u di u sabi taa u du ën fajafaja, söseei u di sömëni sëmbë bi ko makandi ku u ko tei dee lei dee Jehovah ta da u!