Soni di u musu hoi a pakisei te a nama ku di könklësi

Dee juu u di könklësi: Di döö u di kamian ka di könklësi o hoi o ta jabi 8:00 juu mamate. A hii dee tu daka tuu, di poku o bigi pëë a 9:20 mamate. Te di poku o bigi pëë, nöö hii sëmbë musu go suku wan sindo kamian, sö taa di könklësi bigi a wan fasi di fiti.

Gafa Jehovah ku kanda: Dee sëmbë u Gadu dee bi ta libi na awooten bi ta gafa Jehovah ku dee kanda de bi ta kanda, nöö te kuma tide poku dë wan fanöudu soni a di dini di u ta dini Jehovah (Ps. 28:7). Hiniwan pisi u di könklësi fuu ta bigi ku wan poku. Ma na pëë nöö de ta pëë poku nöö a kaba, ma de ta pëë de u heepi u u lei soni u Jehovah, söseei u dini ën. Fëën mbei te di fesima taki taa poku o bigi pëë, nöö u musu go sindo sö taa u sa haika dee poku dee o pëë. An bi o dë wan köni soni u taanpu ta fan ku wotowan go dou. Te u ta du sö, nöö u ta lei taa u ta tei ën u bigi seei taa dee baaa ku sisa fuu ta mbei hii möiti u mbei dee poku aki da u. Tu pasi a wan jaa dee baaa ku dee sisa aki ta paka ku u deseei möni u go a Patterson di dë a New York, u go mbei dee suti poku aki da u. Baka te hii sëmbë haika dee poku, nöö de sa hopo taanpu u kanda dee Könuköndë kanda fuu u gafa Jehovah.

Kamian u buta wagi: Gaantangi, haika te dee heepima ta lei i ka i musu buta di wagi fii.

Sindo kamian: Te i dou a di könklësi, nöö ja musu biinga kule go tei sindo kamian kuma fia i ta fia ku dee baaa ku sisa fii. Gaantangi hoi wotowan a pakisei, aluwasi i musu disa wan kamian ka i bi o kë sindo da wan woto baaa nasö sisa fii. Te wa ta pakisei useei nöö, nöö sëmbë o sa si taa u da tuutuu Keesitu sëmbë, nöö di soni dë sa mbei taa de o kë gafa Gadu tu (Joh. 13:34, 35; 1 Kol. 13:5; 1 Pet. 2:12). I sa tei sindo kamian da dee sëmbë dee i ku de ko ku di wan wagi, dee i ku de ta libi a di wan wosu, nasö dee i ta lei soni u Bëibel. Na buta soni a dee suutu ka ja o sindo. Te i du sö, nöö woto sëmbë o si taa sindo kamian dë jeti. De seti sindo kamian da gaandi sëmbë ku sëmbë di suwaki, nasö di an sa waka. U di wan tu sutuu nöö dë da dee lö sëmbë aki, mbei wan nasö tu sëmbë di ta tja de nöö sa sindo ku de.

Bisi di fiti: Di fasi fa woo bisi ko a di könklësi an musu dë kumafa dee goonliba sëmbe ta bisi soni, ma u musu bisi soni di fiti (1 Tim. 2:9). Ee woo libi a hotëli a di pisiten u di könklësi nasö baka di könklësi, nöö wa musu bisi fanjanfajan, nasö bisi soni a wan fasi di na fiti. Söseei a di pisiten u di könklësi u kë bisi di lapëlkaita fuu sö taa u sa peleiki da sëmbë te u feni di okasi. Di fasi fa woo bisi ku di fasi fa woo tja useei a di könklësi di ta ko, o mbei taa bunuhati sëmbë o kë haika di bunu buka di dë a Bëibel, di sa mbei de feni libi, söseei a o mbei Jehovah piizii seei.​—Sef. 3:17.

Di fasi fa u musu wooko ku tëlëfön nasö computer soni: U ta lei taa u ta hoi wotowan a pakisei te u ta seti di tëlëfön fuu nasö di tablet fuu a sö wan fasi taa an ta puu sëmbë pakisei. Ee joo hai fëlön tei ku di Camera fii, nasö ku di tablet fii, nöö i musu luku bunu u na puu wotowan pakisei nasö tapa de fesi. U ta lei taa u abi bunu manii te wa ta app, nasö ta sms sëmbë te di könklësi bigi kaa, boiti ee a dë fanöudu.

Te woo njan: U ta hakisi hii sëmbë ee de sa tja wan soni u njan sö taa an de u de go a sitaati u go bai soni u njan. I sa tja wan piki ëisi bökusu fii di i sa buta a di sutuu fii basu ka i ta sindo. Ma wa musu tja gaan ëisi bökusu ku gaasi bata ko a di kamian ka sëmbë ta sindo.

Möni di sëmbë kë da: U ta lei taa u ta tei ën u bigi seei taa dee baaa ta mbei möiti u seti soni da di könklësi, te u ta da möni da di wooko di ta du a hii së u goonliba. Sëmbë sa da wan tjëki a di nën u „Gemeente Paramaribo van Jehovah’s Getuigen”.

Deesi: Ee i abi wan deesi di data da i fii ta bebe, nöö gaantangi tjëën fii sa feni bebe te i abi ën fanöudu, u di ja o sa feni di lö deesi dë a di könklësi.

Soni di u musu du fu wa kisi makei: Luku bunu be ja kisi makei, söseei fi ja kooga kai. Hiniwan jaa sëmbë ta kisi makei u di de ta bisi gaan hei susu. A bi o bunu fi ja bisi susu di sa mbei i kisi makei.

Sëmbë di an ta jei soni bunu: Di komakandi o dë u jei a ladio a di kamian ka di könklësi ta hoi. Ee i kë jei hii dee taki dee o hoi, nöö i sa tja wan piki ladio fii nasö wan tëlëfön di abi ladiö ku wan headphone. Hii di könklësi o dë u jei a 107.9 FM.

Peleiki te i feni di okasi: Peleiki da hiniwan sëmbë te i feni di okasi u du ën. Ee wan sëmbë kë fuu go lei ën soni u Bëibel, nöö lei ën unfa a sa go a jw.org u sikifi hën në, hën tëlëfön nöbu, ku di kamian ka a ta libi. Nasö i sa sikifi de buta a wan Gobaka-pampia, nöö i da di sekretares u di kemeente fii di pampia.

Lëstolan: Ee joo go njan a wan lëstolan, nöö tja iseei a wan fasi di fiti, di sa mbei sëmbë gafa Jehovah. Söseei bisi soni di fiti Keesitu sëmbë tu.

Sëmbë di kë heepi ku wooko: Ee wan sëmbë kë heepi wooko a di könklësi, nöö a sa go buta hën në a di kamian ka sëmbë di kë heepi nango buta de në. Dee miii dee an tapa 16 jaa jeti sa heepi u du so wooko tu, ma de mama ku de tata musu dë makandi ku de, nasö wan woto sëmbë di o sa luku de.