Heepi dee bookowojoma u ko sabi Jehovah
1. Unfa Jesosi bi lei taa a abi tjalihati da dee bookowojoma?
1 An bi o tei longi möön ufö de kii Jesosi. Hën wan daka di Jesosi ta kumutu a di foto Jelikou, hën a si tu bookowojoma di ta pidi sëmbë soni. Hën de ta bai dëën taa: „Masa, ju di Heepima dë, u begi i gaantangi, saa u ooo! Heepi u!” Hii fa Jesosi bi ta pakisei dee gaan fuka dee bi o miti ën, tökuseei an bi waka go dou, ma a taanpu, hën a kai dee womi be de ko, hën a kula de (Mat. 20:29-34). Unfa u sa lei taa u abi tjalihati u wotowan kumafa Jesosi bi abi tjalihati u dee bookowojoma?
2. Unfa u sa peleiki da wan bookowojoma di u miti?
2 I musu ta heepi sëmbë a soni: Ee i miti wan bookowojoma a wan kamian, nöö piki ën ambë da i, söseei hakisi ën ee i sa heepi ën ku wan soni. U di sëmbë an ta kë lesipeki dee lö sëmbë aki, mbei kandë di sëmbë an o kë futoou i. Ma ee i abi sutifasi, söseei ee i ta lei ën taa i ta booko i hedi ku ën, nöö kandë an o pakisei sö möön. Hoi a pakisei tu taa i abi sëmbë di wojo booko möön wotowan, nöö di soni dë o heepi i fii sa sabi fa i musu heepi di sëmbë tjika. Te i kaba heepi di sëmbë, nöö i sa piki ën taa i ta heepi sëmbë u ko sabi soni u Bëibel. Hakisi ën ee i sa lesi wan tëkisi dëën. Nöö kandë i sa lesi Psalöm 146:8 nasö Jesaaja 35:5, 6 dëën. Ee a sa’ u lesi Braille, wanlö lëtë di dee bookowojoma ta lesi ku finga, nöö hakisi ën ee a bi o kë wan buku di sikifi a Braille di o heepi ën faa lei möön soni u Bëibel. Söseei heepi ën download buku ku brochure a jw.org faa ta haika. Ee a abi wan programa nëën computer di sa lesi soni dëën, nöö a sa haika wan tu u dee woto dee dë a jw.org.—Luku di pisi „Te i ta heepi wan bookowojoma . . . ”
3. Unfa u sa go suku dee bookowojoma a di pisiwata ka u ta peleiki?
3 Suku dee bookowojoma: Wa ta miti bookowojoma sö hia te u nango peleiki da sëmbë a de pisi, u di sömëni u de an lo’ u fan ku sëmbë di de an sabi. Fëën mbei u musu mbei taanga möiti u go „suku” dee lö sëmbë aki u peleiki da de (Mat. 10:11). I ku wan bookowojoma ta wooko a di wan kamian nasö ta sindo a di wan kalasi ö? Wë mbei möiti u go fan ku ën. Ee wan bookowojoma siköö dë a di pisiwata ka i ta peleiki, nöö i sa hakisi de u tja dee Braille buku fuu go da di siköö. I sabi wan sëmbë di abi wan bookowojoma nëën famii ö? Di pisiwata ka i ta peleiki abi wan kamian ka de ta heepi bookowojoma nasö ka de ta hoi bookowojoma u? Wë ee a dë sö, nöö i sa piki di sëmbë di abi di bookowojoma nëën famii nasö di sëmbë di ta wooko a di kamian ka de ta hoi bookowojoma nasö i sa piki di basi u di kamian seei, taa Jehovah Kotoigi ta mbei möiti u heepi dee bookowojoma tu. I sa hakisi ën ee i sa tja wan tu buku di sikifi a Braille, nasö buku di u buta a cd go da de. Lei di sëmbë taa di Bëibel ta taki taa abiti möön Gadu o mbei hii dee bookowojo ko ta si baka. Söseei i sa lei ën di fëlön, „Zonder zou ik me verloren voelen” di dë a jw.org di ta lei unfa wan bookowojo womi bi feni wini u di lei di a bi ta lei soni a di Bëibel di sikifi a Braille lëtë. Ee i piki dee sëmbë faandi mbei i ko a de, nöö di soni dë sa mbei de da i pasi fii sa miti dee bookowojoma.
4. Andi u sa lei u di woto u Janet?
4 Wan sisa di wojo fëën booko di de ta kai Janet, bi guwenti u go a wan kamian ka de ta hoi bookowojoma. A bi bigi fan ku wan mujëë. A bi piki di mujëë taa: „Jesosi bi ta kula dee bookowojoma u lei u andi a bi o du da hii dee bookowojoma a di ten di ta ko.” De bi luku di tëkisi u Akoalimbo 21:3, 4 makandi, hën Janet lei ën unfa di Könuköndë u Gadu o mbei di soni di Gadu paamusi dë pasa tuutuu. Di mujëë ko fika pii hën a taa: „Nöiti ma bi jei wan bookowojoma taki di soni aki wan daka. Gaansë u sëmbë ta pakisei taa dee bookowojoma an ta si soni u di de bi du wan hogi nasö u di dee gaansëmbë u de bi du wan hogi.” Janet bi e-mail wan link u di Bëibel-lei buku dëën, nöö nöunöu Janet ta lei ën soni u Bëibel tu pasi a wan wiki.
5. Hii fa wa sa kula bookowojoma kumafa Jesosi bi ta kula de, tökuseei un wini woo feni te u ta lei taa u ta booko u hedi ku de?
5 Tuu taa wa sa kula bookowojoma kumafa Jesosi bi ta kula de, ma u sa heepi dee sëmbë di di Gadu u di goonliba aki dungu de wojo, söseei u sa heepi dee bookowojoma u ko fusutan di tuutuu lei di dë a di Wöutu u Gadu (2 Kol. 4:4). Jesosi bi kula dee tu womi dee bi ta libi zuntu u Jelikou u di „tjali u de” bi kisi ën (Mat. 20:34). Ee u ta lei taa u ta booko u hedi ku dee bookowojoma leti kumafaJesosi bi ta booko hën hedi ku de, nöö woo ta dë waiwai u di u abi di gaandi u heepi sëmbë u de ko lei sabi soni u Jehovah, di Gadu di o mbei taa hii bookowojoma o ko ta si soni baka.